Сенатор Грэм Россияга қарши «ҳалокатли» санкциялар қонуни Конгрессда кўриб чиқилишини айтди

Россияга қарши санкциялар тўғрисидаги қонун лойиҳаси Конгрессда «президент Трампнинг розилиги билан» илгари сурилади, деб ёзди «ҳалокатли» санкциялар тўғрисидаги қонун лойиҳаси муаллифи сенатор Линдси Грэм ижтимоий тармоқда.

Унинг сўзларига кўра, Россияга қарши санкциялар тўғрисидаги қонун лойиҳаси Трампга Украинадаги можарони тўхтатиш учун кўпроқ восита беради ва уни «муносиб, адолатли, узил-кесил ва бутунлай» якунлаш имкониятини яратади.

Апрель ойида сенаторлар Грэм ва Ричард Блюментал Россияга қарши санкциялар тўғрисидаги қонун лойиҳасини таклиф қилди. У агар Россия Украина билан узоқ муддатли сулҳга рози бўлмаса, Россия нефти, гази, урани ва бошқа маҳсулотларини сотиб олувчи мамлакатлардан импортга 500 фоизлик бож жорий этишни назарда тутади.

Сенатор сўзларига кўра, гап Россия нефтининг энг йирик харидорлари бўлган Хитой ва Ҳиндистон ҳақида ҳам бормоқда. Грэмнинг айтишича, қонун лойиҳасини Сенатнинг 100 аъзосидан 80 нафари қўллаб-қувватлашга тайёр.

Сенаторлар 2025 йил июнь ойи ўрталарида бўлиб ўтадиган G7 саммитигача ушбу чораларни кўришни режалаштирган эди, бироқ Трампнинг Россия ва Украина можаросини ҳал қилиш ҳақидаги баёнотлари фонида қонун лойиҳасининг илгари сурилиши вақтинча тўхтатилди ва 4 август куни Конгресснинг юқори палатаси таътилга чиқди.

Октябрь ойида юқори палатадаги республикачилар етакчиси Жон Тюн Россияга қарши санкциялар тўғрисидаги қонун лойиҳасини сенатда кўриб чиқиш президентлар Трамп ва Владимир Путин учрашувигача қолдирилганини айтганди. 16 октябрь куни етакчилар Будапештда яқин икки ҳафта ичида учрашув ўтказишга келишиб олди. Бироқ 23 октябрга ўтар кечаси Трамп уни бекор қилди. Путиннинг сўзларига кўра, учрашув қолдирилган.

Тюн «жуда кучли сигнал» бўладиган қонун лойиҳасини қабул қилиш истагини билдирди, чунки «европаликлар ҳам Қўшма Штатлардан етакчиликни кутмоқда».

Россия президенти матбуот котиби Дмитрий Песков янги чекловлар киритиш таҳдидларига жавобан Россия «етарлича узоқ вақт давомида кўп сонли санкциялар остида яшаётгани» ва унда «муайян иммунитет» шаклланганини айтди.