Тожикистоннинг Ўзбекистондаги янги элчиси тайинланди

Тожикистон президенти Имомали Раҳмон мамлакат Ташқи ишлар вазирлиги раҳбариятида кадрлар ўзгаришини амалга оширди. Жумладан, Тожикистоннинг Ўзбекистондаги элчиси ўзгарди, шунингдек, ТИВнинг биринчи ўринбосари лавозимига янги шахс тайинланди.

Насриддин Исматулло Фото: Тожикистон ТИВ

18 ноябр куни Тожикистон президенти Имомали Раҳмон мамлакат Ташқи ишлар вазирлиги тузилмалари раҳбариятига кадрлар бўйича бир қатор ўзгаришлар киритди.

Президент фармонларига мувофиқ, Абдужаббор Раҳмонзода Тожикистоннинг Ўзбекистондаги фавқулодда ва мухтор элчиси лавозимидан озод этилди. Унинг ўрнини давлат идораларида катта тажриба ва меҳнат стажига эга Насриддин Исматулло эгаллаб, Тожикистоннинг Ўзбекистондаги янги фавқулодда ва мухтор элчиси этиб тайинланди.

Шу билан бирга, ҳукумат қарорларига биноан Насриддин Исматулло Тожикистон ташқи ишлар вазирининг биринчи ўринбосари лавозимидан озод этилди. Ушбу лавозимга давлат тузилмаларида кўп йиллар фаолият юритган Фаррух Ҳамролизода тайинланди.

Расмий маълумотларга кўра, мазкур кадрлар ўзгариши Тожикистон ташқи сиёсий идораси фаолиятини янада такомиллаштириш ва қўшни мамлакатлар, жумладан, Ўзбекистон билан ҳамкорликни ривожлантиришга қаратилган.