Трамп "Эпштейн файллари"ни эълон қилишга чақирди

АҚШ президенти Доналд Трамп 17 ноябр куни Республикачилар партияси аъзоларини Конгресс Вакиллар палатасида америкалик молиячи Жеффри Эпштейн иши бўйича материалларни эълон қилишни назарда тутувчи ташаббусни қўллаб-қувватлашга чақирди. Унинг таъкидлашича, республикачилар "яширадиган ҳеч нарса йўқ". Мос баёнот Truth Social ижтимоий тармоғидаги унинг саҳифасида эълон қилинди.

Трамп интернетда тарқалаётган, унинг Эпштейн билан яқин муносабатлари ҳақидаги иддаоларни АҚШда балоғатга етмаганларни фоҳишаликка мажбурлашда айбланган Эпштейнга нисбатан "демократларнинг мистификацияси, радикал сўлчилар томонидан Республикачилар партиясининг улкан ютуқларидан, жумладан демократлар уюштирган 'шатдаун' (ҳукумат ишининг қисман тўхтатилиши) устидан биз яқинда қозонган ғалабадан эътиборни четга тортиш учун ўйлаб топилган ҳийла" деб атади.

Трампга кўра, "АҚШ адлия вазирлиги аллақачон 'Эпштейн' иши бўйича ўн минглаб саҳифаларни ошкор этди, демократлар партиясидан бўлган турли сиёсатчиларнинг (Билл Клинтон, Рид Ҳоффман, Ларри Саммерс ва бошқалар) Эпштейн билан боғлиқлиги бўйича текширув олиб бормоқда, Вакиллар палатасининг назорат қўмитаси қонуний ҳуқуққа эга бўлган барча материалларга кириш имкониятига эга!" – деб ёзди Трамп.

У, шунингдек, "агар демократларнинг қўлида қандайдир далил бўлганида, улар буни биз сайловда ишонарли ғалаба қозонишимиздан аввал ошкор қилган бўларди", дея қўшимча қилди.

Трампнинг бу баёноти 12 ноябр куни Вакиллар палатасининг назорат қўмитаси аъзолари Эпштейн иши бўйича молиячининг меросхўрларидан олган янги материалларни эълон қилганидан бир неча кун ўтиб янгради. Ушбу ҳужжатларнинг бир қисмидан Трамп марҳумнинг жиноий фаолиятидан хабардор бўлган бўлиши мумкин, деган хулоса келиб чиқади.

Ўша куниёқ Вакиллар палатасида Адлия вазирлиги ихтиёрида бўлган Эпштейн ишининг барча материалларини ошкор қилиш масаласини овозга қўйиш ташаббуси илгари сурилди. "Эпштейн файлларининг шаффофлиги тўғрисидаги акт" (Epstein Files Transparency Act) деб номланган бу қонун лойиҳаси, кутилганидек, шу ҳафтанинг ўзида овозга қўйилади.

Трампнинг ўзи эса Адлия вазирлиги ва ФТБдан АҚШ собиқ президенти Билл Клинтон, АҚШ собиқ молия вазири Ларри Саммерс ҳамда LinkedIn асосчиси Рид Ҳоффманнинг Эпштейн билан эҳтимолий алоқаларини текширишни сўрашини айтди. Унга кўра, эълон қилинган ёзувлар ушбу шахслар ўз ҳаётининг "анча катта қисмини" Эпштейн билан бирга ўтказганини кўрсатади.

2021 йилдан бери Жоржия штатидаги округдан Вакиллар палатаси аъзоси бўлган Маржори Тейлор Грин ўтган ҳафта демократлар ташаббуси билан тайёрланган "Эпштейн файлларининг шаффофлиги тўғрисидаги акт"ни мажбурий тарзда кўриб чиқиш ҳақидаги петицияни имзолаган тўрт нафар республикачидан бири бўлди.

Бунга жавобан Трамп Гринни "хоин" деб атади ва унга губернатор ёки сенатор лавозимига номзодини қўймаслик ҳақида берган маслаҳатидан сўнг, ўзини қўллаб-қувватлашни тўхтатганини билдирди.

Сайловолди кампанияси даврида Трамп Эпштейн билан боғлиқ шахслар рўйхати – собиқ банкирга алоқадор деб ҳисобланган шахслар "Эпштейн досеси"ни эълон қилишга ваъда берган эди. Эпштейнга балоғатга етмаган қизларга нисбатан жинсий зўравонликда айблов қўйилган. Трампнинг айтишича, ушбу можарога кўплаб сиёсий элита вакиллари аралашган эди. Бироқ президент ўзи берган бу ваъдани амалга оширмади.

Илон Маск эса Трамп билан очиқ низо чоғида Оқ уй раҳбари ўзи ҳам "Эпштейн досеси"да тилга олинганини айтди. Бу эса кўплаб фитна назарияларининг пайдо бўлишига сабаб бўлди.