Эрдўған Киев ва РФ ўртасидаги музокараларни Истанбулда қайта бошлашга чақирди

Туркия президенти Ражаб Тоййиб Эрдўған Москва ва Киевни Истанбулда тўғридан тўғри музокараларга қайтишга чақирди. Унга кўра, музокаралар «урушнинг ҳар икки томон учун вайронкор оқибатларини» ҳисобга олган ҳолда жуда муҳим. Эрдўған бу ҳақда 19 ноябр, чоршанба куни Анқарада Украина президенти Володимир Зеленский билан биргаликда ўтказилган матбуот анжуманида маълум қилди.

Унинг сўзларига кўра, Украина президенти билан учрашувда у «прагматик ва натижага йўналтирилган ёндашув» асосида Истанбул жараёнини давом эттириш зарурлигини таъкидлаган. Туркия раҳбарига кўра, бу музокаралар «урушнинг вайронкор оқибатлари ҳар икки тараф учун кучайиб бораётган бир пайтда олиб борилаётган дипломатик саъй-ҳаракатларда муҳим босқич»дир. Анқара, шунингдек, барча ҳамкорлардан Истанбул жараёнини ишга тушириш масаласида «конструктив ёндашув» кутаётганини таъкидлади. Эрдўған, шу билан бирга, доимо Россия билан тинчлик таклифларини муҳокама қилишга тайёрлигини ва бу жараёнда АҚШ иштирокини қадрлашини қўшимча қилди.

Володимир Зеленский матбуот анжуманида музокаралар масаласида Эрдўғаннинг позициясини қўллаб-қувватлади. «Биз турк дипломатиясининг кучига умид қиламиз, унинг Москвада тушунарли бўлишига ишонамиз», — деди Зеленский. У Россиянинг Украинага қарши уруши контекстида «кўплаб жараёнлар» фаоллашганини таъкидлади.

«Биз барча фаолият айнан тинчликка, муносиб тинчликка, кафолатланган хавфсизликка қаратилган бўлиши учун ҳаракат қиляпмиз. Уруш тугаши керак. Тинчликка муқобил нарса йўқ. Россия уруш ва ўлдиришлар учун ҳеч қандай мукофот бўлмаслигини англаб етиши лозим», — деди Украина президенти.

У Киев Россия билан асирлар алмашинуви жараёнини қайта тиклаш учун саъй-ҳаракатлар қилаётганини қайд этди. «Умид қиламизки, йил охирига қадар алмашинувларни қайта бошлаймиз ва катта миқдорда асирларни қайтаришга эришамиз. Бу борада Туркия бизга жуда катта ёрдам бермоқда», — деди Зеленский.

Шунингдек, у айниқса, Туркияни «кўнгиллилар коалицияси» деб аталувчи тузилма ишларига жалб этиш имконияти жуда муҳимлигини таъкидлади, айниқса денгиз кучлари компонентига тегишли масалаларда. «Ҳамма Қора денгизда хавфсизликнинг аҳамиятини тушунади, бу хавфсизликни фақат Туркия билан ҳамкорликда таъминлаш мумкин», — деб қўшимча қилди Украина президенти.