AFP: Украина Россияга ер бериш эвазига АҚШдан хавфсизлик кафолати олиши мумкин

Бундан аввал Украина президенти Володимир Зеленский Оқ уй режасини муҳокама қилишга розилик билдирган эди. Мазкур ҳужжатга кўра, бошқа шартлар қаторида, Украина АҚШнинг хавфсизлик кафолатлари эвазига ўз ҳудудининг бир қисмидан воз кечиши керак бўлади.

Украина Олий Радаси депутати Алексей Гончаренко 21 ноябр кечқурун ўзининг Telegram-каналида Россия ва Украина ўртасидаги урушни якунлаш бўйича Трамп режаси, деб тахмин қилинаётган ҳужжат суратларини эълон қилди. АҚШ ҳозирча бу ҳужжатнинг ҳақиқийлигини тасдиқлагани йўқ.

Гончаренко эълон қилган режа 28 банддан иборат бўлиб, унда ҳудудий масалалар, Украина суверенитети, НАТО билан ҳарбий ҳамкорлик, Россиянинг жаҳон иқтисодиётидаги мақоми ва бошқа масалалар қамраб олинган.

Режанинг иккинчи бандида айтилишича, Украина, Россия ва ЕИ «ҳамма томонлама ҳужум қилмаслик тўғрисида битим» имзолайди, шу билан охирги 30 йилдаги барча баҳсли масалалар ҳал этилган, деб ҳисобланади.

Ҳужжатга кўра, Қрим яримороли, Донецк ва Луханск вилоятлари амалда Россия ҳудуди, деб эътироф этилиши лозим. Херсон ва Запорижжя вилоятлари эса фронтнинг ҳозирги чизиғи бўйлаб Россия ва Украина ўртасида бўлиниб чиқилади. Иккала давлат келгусида чегараларни куч билан ўзгартирмаслик мажбуриятини олади. НАТО қўшинлари Украина ҳудудига жойлаштирилмаслиги керак.

Трамп режаси деб тахмин қилинаётган ҳужжатга кўра, АҚШ ва Европа Украинани тиклашни молиялаштириши лозим. Шу мақсад учун Россия Федерациясига тегишли музлатилган 100 млрд доллар актив ҳам йўналтирилади.

Шу билан бир вақтда, ҳужжатга кўра, Россияга нисбатан қўлланган халқаро санкциялар босқичма-босқич бекор қилинади, Москва ва Вашингтон эса узоқ муддатли иқтисодий ҳамкорлик тўғрисида келишув имзолайди.

Шунингдек, Трампнинг эҳтимолий режаси тинчлик келишуви имзоланганидан сўнг дарҳол оташкесим эълон қилишни ва «ҳаммани ҳаммага алмашиш» форматида ҳарбий асирларни алмашишни назарда тутади. Келишувга риоя этилиши устидан назоратни эса Доналд Трамп раҳбарлигидаги «тинчлик кенгаши» амалга оширади.