Тошкентда экологик талабларни бажармаган қурувчи ташкилотлар жавобгарликка тортилди

Тошкент шаҳри Қурилиш ва уй-жой коммунал хўжалиги соҳасида ҳудудий назорат қилиш инспекцияси ҳамда қатор масъул ташкилотлар томонидан қурилиш объектларида кучайтирилган тартибда «Қурилишда хавфсизлик техникаси» шаҳарсозлик меъёр ва қоидаларига мувофиқ ишлар амалга оширилаётгани юзасидан назорат тадбирлари олиб борилмоқда.

Қурилиш инспекцияси хабарига кўра, назорат тадбирлари Тошкент шаҳрида экологик вазиятни яхшилаш, шунингдек, қурилиш жараёнида санитария-гигиена талабларига қатъий риоя этилишини таъминлашга қаратилган.

Жараён давомида ҳар бир объектнинг амалдаги ҳолати ўрганилиб, қуйидаги жиҳатларга алоҳида эътибор қаратилган:

- қурилиш майдонида чангланишни камайтириш мақсадида сув пурковчи ускуналарнинг ўрнатилгани ва мунтазам ишга туширилиши;

- объектга кириш-чиқиш йўлакларида махсус ювиш майдончалари воситалари мавжудлиги;

- юк ва енгил транспорт воситаларининг ҳудуддан тозаланган ҳолда чиқиб кетиши таъминлангани;

- ер майдонларида чангланиш хавфини камайтиришга қаратилган қўшимча профилактик тадбирларнинг жорий этилгани.

Ўрганиш давомида 53 та объектида чанг ва қум заррачаларининг ҳавога кўтарилишини олдини олишга доир талаблар бузилгани, 47 та ҳолатда қурилиш майдонининг 25 фоизи кўкаламзорлаштирилмагани аниқланган.

Қоидабузарликлар бўйича 35 та мажбурий кўрсатма берилган, 24 та объектга сув пуркагич ускуналари ўрнатилган, 47 та объектга автотранспорт воситаларини ювиш майдончалари барпо этилган. Шунингдек, 60 га яқин қурувчи ташкилот вакили маъмурий жавобгарликка тортилган.