Афғонистонда 13 ёшли бола қариндошларининг қотилини 80 000 томошабин олдида қатл қилди

Қатл Хост провинциясидаги стадионда бўлиб ўтди, у ерда 80 мингга яқин одам тўпланди, деб ёзди The Independent. БМТ содир бўлган воқеани «шафқатсиз ва ғайриинсоний» деб атади.

Мангал Фард исмли эркак ва унинг икки ўғли ўсмирнинг 13 нафар оила аъзосини, жумладан, бир неча бола ва аёлларни ўлдирганликда айбланди, деб ёзди Amu.tv.

Жабрланувчиларнинг қариндошларига жиноятчини кечириш таклиф этилди, бироқ улар рад этиб, ўлим жазосини қўллашни талаб қилди. Фарднинг ўғиллари ҳам ўлим жазосига ҳукм қилинди, бироқ улар мамлакатда йўқлиги сабабли жазо «кечиктирилди».

The Taliban carried out a public execution of a man in a stadium before 80,000 spectators in Khost province!
What's even more alarming is that @AmuTelevision reports the executioner was a 13-year-old boy who pulled the trigger !!
This should Trigger a warning to the world.… pic.twitter.com/qbRpEPjPpn

— Nilofar Ayoubi 🇦🇫 (@NilofarAyoubi) December 2, 2025

Эркак Афғонистоннинг барча учта инстанцияси - қуйи, апелляция ва Олий суди ўлим ҳукмини тасдиқлаганидан сўнг отиб ўлдирилган, якуний маъқуллаш эса мамлакат олий раҳбари Ҳибатуллоҳ Охундзода томонидан чиқарилган.

Қайд этилишича, «Толибон» вакиллари қатлни томоша қилишга келганларга камерали телефонларни олиб киришни тақиқлаган. Афғонистонлик журналист ва ҳуқуқ ҳимоячиси Нилуфар Айюбий томонидан эълон қилинган видеода қатл маросими бўлиб ўтган стадион атрофида одамлар тўпланганини кўриш мумкин.

БМТ ўзининг Афғонистон бўйича махсус маърузачиси Ричард Беннетт орқали ушбу оммавий қатлни «ғайриинсоний, шафқатсиз ва халқаро ҳуқуққа зид» деб қоралади.

Таъкидланишича, бу «Толибон» Афғонистонда ҳокимиятни қўлга киритганидан бери амалга оширган ўн биринчи қатл.