Саида Мирзиёева Туркманистондаги халқаро конференцияда иштирок этди

Тадбир замонавий жамиятда хотин-қизларнинг ўрнига бағишланди.

Фото: Telegram/Saida Mirziyoyeva

Президент Администрацияси раҳбари Саида Мирзиёева Туркманистоннинг Аваза шаҳрида «Замонавий жамиятда хотин-қизларнинг ўрни» мавзусидаги халқаро конференцияда иштирок этди.

«Бугун Авазада «Замонавий жамиятда хотин-қизларнинг ўрни» мавзусидаги халқаро конференцияда тенг ҳуқуқлилик ва хотин-қизлар ҳиссасининг муҳимлиги ғоялари чуқур тарихий илдизларга эга экани ҳақидаги фикрларим билан ўртоқлашдим. Ўзбекистонда хотин-қизларнинг таълим, тадбиркорлик соҳаларида имкониятларини кенгайтириш ва ҳуқуқларини ҳимоя қилиш бўйича амалга оширилаётган ишлар ҳақида сўзлаб бердим.

Хотин-қизлар ҳуқуқларини ҳурмат қилиш, бунда ўзаро қўллаб-қувватлаш ва ҳамжиҳатлик муҳимлигини қайд этдим. Ишонаманки, биргаликдаги саъй-ҳаракатларимиз билан ҳар бир аёл ўз салоҳиятини тўлиқ рўёбга чиқариши учун шароит ярата оламиз», деб ёзди Саида Мирзиёева.