Трамп Киевни президентлик сайловларини қайта ўтказишга чақирди

Россия Федерацияси томонидан Украинага нисбатан ҳарбий тажовуз давом этаётганига қарамасдан, Украинада президентлик сайловларини ўтказиш вақти келди, деб ҳисоблайди АҚШ президенти Доналд Трамп. «Ҳа, деб ўйлайман, вақти келди. Ўйлашимча, ҳозир сайловлар ўтказиш учун муҳим даврдир. Улар урушдан сайлов ўтказмаслик учун фойдаланяпти, лекин менимча, украин халқи бундай танлов имконига эга бўлиши керак», — деди у сешанба, 9 декабр куни чоп этилган Politico нашрига берган интервюсида.

Трампнинг фикрича, Украина президенти Володимир Зеленский қайтадан ғалаба қозониш имконига эга. «Ким ғолиб бўлишини биламан, деб айта олмайман. Аммо улар анча вақтдан бери сайловлар ўтказмади. Биласизми, улар демократия ҳақида гапиради, лекин маълум бир паллада бу энди демократия бўлмай қола бошлайди», — деб қўшимча қилди у Украинадаги урушни ўзи таклиф қилган тинчлик режасига мувофиқ тугатишга интилар экан.

Украина президентининг навбатдаги сайловлари тақвимга мувофиқ 2024 йилда бўлиб ўтиши керак эди, бироқ мамлакатда Россия Қуролли кучларининг тўлиқ кўламли ҳужуми бошланиши билан жорий этилган ҳарбий ҳолат туфайли уларнинг ўтказилиши кейинга қолдирилди. Кремл бу ҳолатдан Зеленскийни «нолегитимлик»да айблаш учун бир неча бор фойдаланган.

Трампнинг иккинчи президентлик муддати бошланганидан бери, жанговар ҳаракатлар давом этаётганига қарамасдан, сайловлар ўтказиш масаласи бўйича муҳокамалар яна фаоллашди. Трампнинг ўзи ҳам бунга чақирди, аммо Киевда бундай қарорни амалга ошириш мумкин эмаслиги айтиб келинди. Жумладан, 2025 йил апрел ойида Олий Рада Украинада президентлик сайловларини ўтказишга тайёргарлик кўрилаётгани ҳақидаги хабарларни рад этди.