“Болангизни кимдир бошқаряпти” — тошкентлик ўсмир PUBG'даги суҳбатлардан кейин йўқолиб қолди

Тошкентда яшовчи 14 ёшли бола PUBG'да номаълум одам билан дўстлашиб қолганидан кейин, унинг буйруғи билан уйдан чиқиб кетиб, Фарғонага йўл олган. Қочаётганида юзини яшириш учун кўзойнак ва тиббий ниқоб тақиб олган. Бола икки кундан кейин топилганида, у катта қўрқув исканжасида эди. Воқеани Kun.uz'га сўзлаб берган ўсмирнинг қариндоши ота-оналарни огоҳликка чақирди.

{Yii::t(}

Ўтказиб юбориш 6s

Ўтказиб юбориш

Яқинда тошкентлик бир оила ноодатий ва хавотирли ҳодисани бошидан ўтказди. 29 ноябр куни 14 ёшли бола уйидан одатдагидек спорт тўгарагига чиқиб кетиб, сирли тарзда ғойиб бўлади.

Ўша куни боланинг йўқолгани ҳақидаги хабарлар интернетдаги кўплаб канал ва гуруҳларда тарқалган эди. Орадан 2 кун ўтиб, унинг дараги Фарғона вилоятидан чиқади. Бола уйига қайтгач, бошидан ўтказганларини ҳикоя қилиб бераркан, ота-онаси ва яқинлари бундан даҳшатга тушади.

Маълум бўлишича, PUBG онлайн ўйинига қизиқиб қолган ўсмир ўйин ичидаги чат орқали номаълум кимсалар билан суҳбатлаша бошлайди. Суҳбатдош унга руҳий босим ўтказиб, ўлдириш билан таҳдид қилади.

Боланинг амакиси Kun.uz'га ҳодиса тафсилотларини айтиб беришди. Унинг ҳикояси – фарзанд ўстираётган ҳар бир ота-она учун қимматли.

“Биз сени спутник орқали кўриб турибмиз”

“Бола таэквондога, тренировкасига бориши керак бўлган. Уйдан 18:30 да чиқиб кетган, ҳеч ким пайқамаган. Тренировкадан одатда соат 22:00 да чиқади. 22:00 да чиққандан кейин, узоғи бир соатда уйда бўлиши керак бўлган. Соат 23:00 да ойиси тренерига телефон қилганида, тренери у бугун машғулотга келмаганини айтган.

Дарҳол қатъий чораларни кўришни бошладик, 102 га телефон қилдик. Ходимлар келишди. Келгандан кейин уйдан хат топишди. Бола хат ташлаб кетган. У ерда қисқача мазмуни: “Мен сизларни рози қилолмадим, яхши фарзанд бўлолмадим. Мусулмон бўлиб қайтаман, пул топиб қайтаман”, деб хат ташлаб кетган. Бизлар ҳатто уйга қарамаган ҳам эдик. У нарсани қидирмаганмиз. Ўзини қидириш билан овора бўлгандик.

Кейинроқ бошқа шаҳардан топилди. Бориб олиб келдик. Биринчи кун индамади, қўрқди. Кейинги куни онасига йиғлаб айтиб берди.

Хуллас, бир ярим ой олдин PUBG ўйинида битта бола билан танишган. “Легенд” деган профил билан танишган ва ўша билан ўйнаб келган. Ўйинда бир-бирини ривожлантиришган, бир-бирига кийимлар берган, қуроллар берган. Хуллас, яқин муносабатда бўлишган. Кейин уни чақиришган: “Фарғона шаҳрига кел, бизникига меҳмонга олиб кетамиз” деб. Бола рози бўлмаган. Кейин уни ишлашга чақиришган: “Сен яхши ўйнар экансан ўйинда, сен дастурчи экансан, кел, яхши пул топамиз, ўйин орқали совғалар оламиз”, деб таклиф беришган. Бола ўзига тўқ оиладан, бу таклифни ҳам рад қилган.

Шундан кейин улар таҳдид қилишга ўтишган. “Сени сўямиз, ота-онангни сўямиз, ўлдирамиз, синглингни олиб кетамиз. Биз сени спутник орқали кўриб турибмиз. Бугун мактабга борибсан-а?” деб сиқувга олишган. 14 ёшли бола мактабга бориши табиий, лекин бола ҳақиқатан ҳам мени кузатишяпти деб ўйлаган ва ўшаларнинг гапига ишонган. Қўрққан – унга одам сўйиш видеоларини ташлаб беришган, унақа видеоларни қўрқинчлилигидан биз катталар ҳам кўролмаймиз”, – дейди ўсмирнинг қариндоши.

“Болани бир зум ҳам ўз ҳолига қўйишмаган”

Амакисига кўра, бола уйдан чиқиб кетишидан аввал номаълум кимсаларнинг кўрсатмаси асосида яхшилаб тайёргарлик кўрган. Синфдошларидан Фарғонага қандай етиб боришни сўраган. Ижтимоий тармоқлардаги барча ёзишмаларини ўчирган, PUBG ўйинидаги дўстлари ҳам ўчирилган, ҳатто телеграмдаги оилавий гуруҳлардан чиқиб кетган.

“Гуруҳдан нега чиқиб кетдинг” деб сўраган ойисига “адашиб чиқиб кетибман”, деган. Ўйинга кирсангиз, ҳеч нарса йўқ: “друзя”лари ким деб боссангиз, “друзя”лар йўқ – ўчирилган. Ҳамма нарсани тозалаб, хат ҳам қолдирган. Фарғона шаҳрига келиб, водий питакка келсанг, сени ўзимиз топиб оламиз дейишган. Уларнинг кўрсатмаси билан кетишида бахила кийган, ниқоб, кўзойнак таққан, кепка, капюшон кийган.

Биз ички ишларга мурожаат қилганимизда, тергов ходими келиб: “Сизнинг болангиз яхши шароитда катта бўлган экан, оилавий муҳити яхши экан, ҳеч қандай қанақадир босим ёки психологик ҳолат йўқ. Фақатгина ҳозирги ҳолат: ўғлингизни кимдир бошқаряпти”, деб айтишди. У одам асли Ўзбекистонда ҳам эмас экан.

Ички ишлар ходимларининг айтишича, шунақа ҳолатлар бўлар эканки, болани хужраларга олиб кириб кетиб, ҳатто йиллар давомида турли мақсадларга тайёрлашар ҳам экан. Контрабанда орқали мол ўтказиш бўйича чегара ҳудудларда қанча тунеллар бор – шулар орқали четга олиб чиқиб кетиши ҳеч гап эмас экан.

Бизга шундай тушунтиришди: чет давлатларда шундай болаларни топиб, тузоққа туширадиган гуруҳлар бор экан. Қиладиган иши – ўйинда ўтириш, вояга етмаган болаларни топиб, “гипноз” қилиб, чақириш. Ўйинга узоқроқ вақт кирмай қолса ёки ёзмай қўйса, “алоқадамисан?” деб назорат қилиб туришган. Болани бир зум ҳам ўз ҳолига қўйишмаган, сал ёлғиз қолиб, “тўхта, нима қиляпман ўзи” деб ҳам ўйлашга қўйишмаган. Кечаси соат 3да ҳам мулоқотда бўлишган”, – дейди у.

“Болангиз билан тез-тез мулоқот қилиб туринг”

Орадан икки суткага яқин вақт ўтиб, боланинг дараги Фарғона вилоятининг бошқа бир шаҳридан чиққан. У топилган пайтда қаттиқ қўрқув ва ваҳимада бўлган.

“Боланинг айтишича, Фарғона шаҳрига борса, қайтиб келолмаслигини билиб, бошқа шаҳарга кетган. Бошқа шаҳарга бориб, бир кеча масжидда ётиб қолган. 200 минг сўм пули бўлган: 150 мингни йўлкирасига берган, 50 мингга овқатланган. Эртасига куни қорни оч, усти юпқа, бориб бир жойдан иш сўраган: қорним очиб кетди, иш берсаларинг ишлардим деган. Ана ўша иш сўраган жойидагилар орқали бола топилган”, – дейди амакиси.

Ўсмир ҳозирда оиласи бағрида. рРуҳий ҳолатини тўлиқ тиклаш эса вақт талаб қилади.

Суҳбатдошимиз ота-оналарни ҳушёр бўлишга, болалар билан тез-тез гаплашиб туришга, ўйнаётган ўйинларига бефарқ бўлмасликка, бирор ноодатий хатти-ҳаракат қиладиган бўлса, юзаки қараб ўтказиб юбормасликка чақирди.

Дилшода Шомирзаева тайёрлади.