“Ногиронлиги бор болаларимизни сарсон қилишяпти” – Фарғонадаги Мурувват уйида махсус гуруҳ ёпилди

Фарғона шаҳар ногиронлиги бор болалар учун “Ғамхўрлик” марказидаги (аввалги Мурувват уйи) кундузги парваришлаш гуруҳлари ёпилиб, тарбияланувчилар хусусий муассасага йўналтирилган. У ерда эса малакали мутахассис йўқ. Оқибатда ўттизга яқин ногиронлиги бор бола қаерга боришни билмай сарсон бўляпти.

Kun.uz мухбири “Ғамхўрлик” масканида бўлиб, ота-оналар билан суҳбатлашди, масъуллардан изоҳ сўради.

Янги тартибдан норози бўлаётган ота-оналар фарзандларини Мурувват уйига қайтаришни сўраб, мутасаддилардан илтимос қилиб қолишди.

“Янги жойда бундай болаларни эплай олишмади”

Сайёра Ёрматова:

— Икки неварам: 16 ва10 ёшли ногирон опа-ука сарсон бўлишяпти. Мурувват уйининг ходимлари невараларимга яхши қарашаётган эди. Нима бўлдики, соҳани тадбиркорларга берамиз деб махсус кундузги гуруҳни ёпиб қўйишди. Ногиронлиги бор невараларим янги муассасага боргандан бери касал. У ерда мутахассислар йўқ экан. Ногиронлиги бор болаларим сарсон бўлгани қолди. Эски Мурувват уйига қайтаришсин уларни.

“Янги боғчага олиб борасизлар, бу ер ёпилди” дейишди. Янги жойда эса биз бундай болаларни эплай олмаймиз деб, ҳужжатларимизни қўлимизга тутқазишди. Ўша куни касал бўлди невараларимдан бири.

Фарғона шаҳридаги Муррувват уйининг шароитлари зўр бўлган. У ерда ҳақиқий мутахассислар бўлган. Ҳеч қанақа камчилик бўлмаган. Бизга шу эски Муррувват уйини очиб беришсин. Сарсон бўлиб кўчада қолган болаларимизни Мурувват уйи яна олсин.

“Ногиронлиги бор фарзандим азобда қолди”

Саида Мирзаазизова:

— Фарзандим 9 йилдан бери Мурувват уйидаги махсус кундузги гуруҳда тарбияланарди. Фарғона шаҳридаги Мурувват уйининг номини ўзгартирамиз деб, ёпиб қўйишди. Ногиронлиги бор болаларимизнинг ҳаммаси сарсон бўлиб кўчада қолди.

Мурувват уйидаги махсус гуруҳ яна очилсин. Чунки биз бюджет ташкилотида ишлаймиз-да, болани қаерда қолдиришни билмай шу ерга келганмиз.

Фарзандим мустақил юра оладиган даражада эмас. Ҳолати оғир. Мурувват уйидаги гуруҳга ўрганган бола касал бўлиб қолди. Боғчага бораман деб тинмай йиғлайди. Ногиронлиги бор болаларимизга раҳм қилинглар. Мурувват уйида ёпилган махсус гуруҳни жойига қайтаринглар, илтимос.

“Комиссия хулосасидан сўнг ҳал бўлади”

Фарғона шаҳар ногиронлиги бўлган болалар учун “Ғамхўрлик” маркази директори Абдуғани Турдибоев:

— Шу кунгача кундузги гуруҳда 28 нафар бола тарбияланар эди. Вазирлар Маҳкамасининг 271-сонли қарорида 2026 йил 1 майдан муассасамиз номидаги “мурувват” деган сўз олиб ташланди, энди “Ғамхўрлик” марказига айлантирилди.

“Ғамхўрлик” марказининг асосий вазифаси – ижтимоий мослашув орқали меҳнат терапиясига, спортга жалб қилиш, боланинг ўзидаги бор имкониятларини юзага чиқариб бериш. Энди ҳозирги пайтда Мурувват уйининг номи “Ғамхўрлик” маркази бўлганлиги учун болалар қайта педагогик-тиббий-психологик комиссиядан ўтиши керак. Комиссия хулосадан кейин бола янги тизимга йўналтирилади.

Мурувват уйидан ташқарида ташкил қилинган янги муассасаларга ўзимизнинг ходимларимиздан берадиган бўлганмиз. Янги жойда болаларнинг ижтимоий мослашуви учун уларга вақт керак бўлади. Балки ўрганишар, балки ота-онасининг ўзида хоҳиш бўлмаётган бўлиши мумкин. Қулайлик тарафлари бор: бизда қандай шароит яратилган бўлса, уларда ҳам ижтимоий хизмат турлари мавжуд.

Педагогик-тиббий-психологик комиссия аъзолари ногиронлиги бор болалар ҳолатини бир қатор кўриб, ташхиси бўйича индивидуал ёндашган ҳолатда хулоса беришади. Низомга тўғри келадиган бўлса,, “Ғамхўрлик” марказларига ёки ўзига яқин ҳудудда бўлган кундузги қатнов хизматларига ҳам жалб қилишимиз мумкин болаларни.

“Янги муассасага мутахассислар жалб қиламиз”

Диёр Абдуллаев, Ижтимоий ҳимоя миллий агентлиги Фарғона вилояти бошқармаси бош мутахассиси:

“Ота-оналарнинг эътирози ўринли. Сабаби, янги ташкил этилган муассасага ҳали мутахассислар жалб этилмаган эди. Шунинг учун ота-оналар қониқиш ҳосил қилмади. Биз бошқа кундузги парвариш хизматини ташкил этяпмиз.

Мурувват уйидан ходимлар, яъни қисқартиришга тушган ходимлар янги ташкил этилаётган муассасамизга ишга жалб қилиняпти. Яқин кунларда ногиронлиги бўлган болаларга қарай оладиган мутахассислар келиб, шу ерда фаолиятини бошлашади”.

Янги тартиб ҳақида қисқача

Маълумот учун, тегишли фармонга асосан, мўътадил, оғир ва чуқур даражадаги ақлий заифлик ёки деменция ташхиси қўйилган I ва II гуруҳ ногиронлиги бўлган шахслар учун оилавий муҳитга яқин шаклдаги қуйидаги янги хизматлар кўрсатилиши жорий қилиниши белгиланган:

• “Янги кун” кундузги қатнов асосида қараб туриш хизмати;
• уй шароитида қараб туриш хизмати;
• кичик ҳажмли “Мадад” уйлари хизмати;
• “Ижтимоий таътил” қисқа муддатли жойлаштириш хизмати.

Санаб ўтилган тўртта хизмат давлат-хусусий шериклик битими асосида хусусий ташкилотлар томонидан кўрсатилади.

Ногиронлиги бўлган шахслар учун “Мурувват” интернат уйлари ногиронлиги бўлган шахслар учун “Ғамхўрлик” марказлари сифатида қайта номланди.