Дуров Путин 2013 йилда унга Россияда эмас, балки хорижда бизнес юритишни маслаҳат берганини айтди

Шундан сўнг, Дуров 2014 йил баҳорида «ВКонтакте»даги улушини сотди ва Россиядан чиқиб кетиб, бир неча ой олдин ишга туширган Telegram платформасини ривожлантириш билан шуғулланди.

Фото: Getty images

Россия президенти Владимир Путин 2013 йилдаёқ «ВКонтакте» ва Telegram асосчиси Павел Дуровга ўз бизнесини хорижда юритишни маслаҳат берган. Бу ҳақда журналист Николай Кононовнинг декабр ойи бошида чоп этилган «Код Дурова 2» китобида сўз боради.

2013 йилда, Дуров ҳали Россияда яшаб, «ВКонтакте» ижтимоий тармоғини бошқарганида, Путин билан учрашган. Унинг айтишича, учрашувда бошқа йирик тадбиркорлар ҳам иштирок этган. Путинга Дуровни «ВКонтакте» платформасининг шу пайтдаги энг йирик акциядори Алишер Усмонов таништирган.

Кутилмаганда Путин ташаббус кўрсатиб, ўзи гапира бошлаган. Дуров сўзларига кўра, унинг «гапларини бўлиш мушкул» эди.

«Сизда, эшитишимча, порнография ва ноқонуний филмлар бор, бизга эса Россияда бундай нарсалар, шунақа яширин ўйин-кулгилар керак эмас», деган Путин. Дуровнинг сўзларига кўра, Путин негадир «Илтимос, бундай бизнес билан шуғулланмоқчи бўлсангиз - уни Исроилда юритинг» деган гапларни такрорлаган.

Бунга жавобан, китобда айтилишича, Дуров Путинга «Россия дастурлаш мактабининг буюклигини» бутун дунёга кўрсатиш режаларида борлигини айтган, «лекин ватанида қолиш мотивлари ўтган йилги қордек эриб кетаётганини ҳис қилган». Ушбу учрашувдан сўнг, у «ВКонтакте»дан шунчаки қутулиш эмас, балки «қамоққа тушмаслик учун» барча лойиҳаларини Россиядан узоқроққа кўчиришга қарор қилган.

Дуров 2014 йил баҳорида «ВКонтакте»даги улушини сотди ва Россиядан чиқиб кетиб, бир неча ой олдин ишга туширган Telegram платформасини ривожлантириш билан шуғулланди. Яқинда берган интервюларидан бирида тадбиркор «ўн йилдан ортиқ вақтдан бери Москвада бўлмаганини» таъкидлади. Шу билан бирга, 2024 йилда «Важные истории» журналистлари ҳаво қатновлари базаларининг сизиб чиққан маълумотларини ўрганиб чиқиб, Дуров ўн йил ичида Россияда камида 50 марта бўлганини аниқлади.

Путин 2024 йилда ҳам Дуров билан фақат бир марта учрашганини айтганди. «У шунчаки режалар ҳақида гапирди. Мен бизнес аҳли билан мунтазам учрашиб тураман ва кўп йиллар олдин Кремлда учрашувлардан бири бўлган», деди Россия президенти.