Эронда миллий валюта курси қулаганидан кейин норозилик намойишлари бошланди

Эронда маҳаллий валюта курси долларга нисбатан рекорд даражага тушиб кетганидан сўнг, охирги уч йилдаги энг йирик норозилик намойишлари бўлиб ўтмоқда. Мамлакат президенти ҳукуматни намойишчиларнинг қонуний талабларига қулоқ солишга чақирди.

Митинглар пойтахт ва мамлакатнинг йирик шаҳарларини қамраб олди. Намойишлар якшанба куни Теҳрондаги Катта бозорда дўкон эгаларининг намойиши билан бошланган ва учинчи кун давом этмоқда. 29 декабр куни бўлиб ўтган илк намойишлардан сўнг Эрон Марказий банки раҳбари истеъфога чиқди.

Хабар қилинишича, хавфсизлик кучлари намойишчиларга қарши кўздан ёш оқизувчи газ қўлламоқда

Намойишларга мамлакатга нисбатан санкциялар босими фонида норасмий бозорда Эрон риёли курсининг пасайиши сабаб бўлган. Reuters агентлигининг қайд этишича, душанба куни маҳаллий валюта курси рекорд даражада пастлаб, бир доллар учун 1,39 млн риёлни ташкил қилди. Бу инфляциянинг тезлашиши билан таҳдид қилмоқда, шунингдек, сотувларни, хусусан, импорт товарларни фалаж қилди, чунки харидорлар ҳам, сотувчилар ҳам курснинг барқарорлашишини кутмоқда, деб ёзди AFP.

Намойишчилар валюта курсининг ўзгаришини тўхтатиш ва аниқ иқтисодий стратегияни ишлаб чиқиш учун ҳукуматнинг зудлик билан аралашувини талаб қилмоқда. Бироқ, Iran International таъкидлаганидек, намойишчиларнинг талабларига иқтисодий талаблардан ташқари сиёсий шиорлар ҳам қўшилган.

Душанба куни кечқурун Эрон президенти Масъуд Пизишкиён ўз ижтимоий тармоқларида ҳукуматни намойишчиларнинг қонуний талабларига қулоқ солишга чақирди:

«Халқ фаровонлиги - менинг кундалик ташвишим. Кун тартибимизда - пул-кредит ва банк тизимини ислоҳ қилиш, аҳолининг харид қобилиятини сақлаб қолиш бўйича принципиал чора-тадбирлар».