Йил якунида ахборот уруши: Россия Путин қароргоҳига зарба берилганини айтмоқда

Календар йили тугаши арафасида Россия ва Украина урушида янги интрига пайдо бўлди. Россия томони Украина Путиннинг Валдайдаги қароргоҳига ҳужум қилишга урингани ҳақида баёнот берди. Бу хабар Зеленский ва Трамп Флоридада кўришган, Трамп тинчлик келишуви имзолаш учун босимни оширган бир вақтда содир бўлди. Бу хабар фонида Россия Беларусга ядровий каллакни олиб учиши мумкин бўлган «Орешник» ракеталарини жойлаштирди.

{Yii::t(}

Ўтказиб юбориш 6s

Ўтказиб юбориш

«Энди кескинроқ позицияда бўламиз»

Путиннинг қароргоҳига ҳужум ҳақида биринчи бўлиб Россия президенти ёрдамчиси Юрий Ушаков гапириб чиқди. Кремл мулозимига кўра, Путин Трамп билан телефон суҳбати чоғида унинг қароргоҳига ҳужум сабаб музокаралардаги Россия позициясини қайта кўриб чиқишини айтган. Кейинроқ Кремл расмий вакили Песков «Россия энди кескинроқ позицияда бўлишини» айтиб чиқди. Ушаковга кўра, Трамп «бу хабардан шокка тушибди ва Украинага Tomahawk ракеталари юбормагани тўғри бўлганини» ҳис қилибди.

Ахборот уруши

Россия ҳозиргача Украина Путиннинг Валдайдаги қароргоҳига ҳужум қилинганига ҳеч қандай исбот тақдим этмади. Ваҳоланки, Россия томонига кўра, қароргоҳга 91 та дрон билан ҳужум қилинган, шаҳар аҳолиси бундай ҳужумни сезган, видеолар тарқалган бўларди.

Песковнинг айтишича, «ҳеч қандай исбот шарт эмас ва шунчаки Россия томонининг баёнотга ишониш керак» экан. Ўзи Трамп тинчлик келишуви имзолашга босим ўтказаётгани ортидан Россия қандайдир манёвр қилиши ва битим имзолашдан қочишини тахмин қилиш қийин эмасди. Чунки Путинни амалда Украина тўлиқ капитуляция бўлишидан бошқа ҳеч қандай сценарий қаноатлантирмайди, ҳатто Донбассни тўлиқ эгаллаш ҳам.

Ва кутилганидек бўлиб чиқди. Россия ўзига хос ахборий манёвр қилди. Бу иш музокараларда ҳал қилувчи одам бўлган Доналд Трампга «Украина сизнинг саъй-ҳаракатларингизни бузмоқчи», дейиш учун қилинаётган бўлиши мумкин.

Қизиғи, Украина Путиннинг қароргоҳига бунгача камида икки марта ҳужум қилган, Кремл томига дрон урилгани эсингизда бўлса керак. Бундан ташқари, Сочидаги президент қароргоҳига ҳам дрон билан ҳужум қилинган, ўшанда Путин ичкарида бўлгани айтилганди. Киев ҳар икки ҳолатда ҳам тўғридан тўғри Путинга ҳужум қилинганини яширмаган, Россия ҳам бу ҳолатга ҳозиргидек эътибор қаратмаганди.

Қизиғи, бу хабарлар фонида Россия Беларусда «Орешник» ракеталарини жойлаштириб, жанговар шай ҳолатга келтирди. Бу ракеталар ядровий каллакни ҳам олиб учиши мумкин. Песковдан шу ракеталарга ишора қилиб Россия қандай жавоб бериши ҳақида сўрашди. Кремл расмий вакили ҳарбийлар қандай жавоб беришни ўзи билишини айтди. Ана шунақа гаплар, азизлар. Бутун дунё байрам кайфиятида бўлган бир вақтда урушда кескинлик яна ошди. Булар байрамда ҳам тинч ўтирадиганга ўхшамайди...

Ўткир Жалолхонов тайёрлади.

Тасвирчи ва монтаж устаси – Фахриддин Ҳотамов.