“Дунёдаги энг йирик нефт захиралари АҚШ рақиблари назоратида бўлмаслиги керак” – Марко Рубио

“Агар Венесуэланинг ҳозирги етакчилари тўғри қарор қабул қилишса, АҚШ улар билан ҳамкорлик қилади”, - деди АҚШ давлат котиби Марко Рубио NBC News телеканалига берган интервюсида.

У шунингдек, АҚШ наркосавдогарларнинг кемаларига зарба беришда ва санкциялар остидаги кемаларни ушлашда давом этишини билдирди.

Венесуэлада сайловлар қачон ўтказилиши ҳақидаги саволга Рубио бунга ҳали эрта эканлигини айтди.

Рубионинг сўзларига кўра, АҚШ Венесуэлага қарши эмас, балки гиёҳвандлик моддалари сотаётган ташкилотларга қарши уруш қилмоқда.

“Гап мамлакатни бошқариш ҳақида бормаяпти. Гап сиёсат ҳақида. Биз Венесуэла маълум бир йўналишда ҳаракатланишини истаймиз”, - деди у Венесуэлани ким бошқариши ҳақидаги саволга жавобан.

У Венесуэланинг айни пайтдаги етакчисига ҳам мурожаат қилди.

“Сиз Венесуэлани Эрон, Россия, Ҳизбуллоҳ, Хитой ёки Куба разведкаси агентлари учун амалиёт марказига айлантира олмайсиз. Бунга йўл қўйиб бўлмайди. Сиз дунёдаги энг йирик нефт захиралари АҚШ рақиблари назорати остида бўлишига йўл қўя олмайсиз”, - деди АҚШ давлат котиби.

“Бизга Венесуэла нефти керакмас. АҚШнинг нефти етарли. Бир нарсани тушунишингиз керак: Хитойга Венесуэла нефти нима учун керак? Россияга-чи? Эронга нега керак? Улар ҳатто бу қитъада жойлашмаган”, - дея қўшимча қилди у.

Унинг сўзларига кўра, “Куба ҳукумати – улкан муаммо”.

“Биз Куба режимининг мухлислари эмаслигимиз сир деб ўйламайман. Венесуэлани қайсидир маънода мустамлакага айлантирганлар – кубаликлардир. Мадурони айнан кубаликлар қўриқларди. Уни венесуэлалик тансоқчилар қўриқламаган. Уларнинг ички разведкачилари ҳам кубаликлар эди”, - деди Марко Рубио.

У Мадуронинг олиб чиқиб кетилишини конгресс маъқуллашини талаб қиладиган ҳолат эмас деб атади.

“Бу бостириб кириш ёки давомли ҳарбий операция эмасди. Конгресс маъқуллашини талаб қиладиган ҳаракатлар учун конгрессдан розилик оламиз. Байден мъмурияти Мадурони тутиш учун 25 млн доллар мукофот берилишини эълон қилганди. Уни тутганимиз учун мукофот нақд, лекин биз бу мукофотни сўрамаймиз. Президент Трамп ва бошқалар орасидаги фарқ айнан мана шунда”, - деди АҚШ давлат котиби.

2 январдан 3 январга ўтар кечаси АҚШ махсус кучлари Венесуэла президенти Николас Мадурони қўлга олиш операциясини ўтказди. Мадуро ва унинг рафиқаси қўлга олиниб АҚШга олиб келинди. Улар наркотерроризмда айбланмоқда.