Венесуэладаги сейсмик офат: қурбонлар сони 5 мингдан ошди

24 июн куни Венесуэлада юз берган икки кучли зилзила оқибатида ҳалок бўлганлар сони 5 069 нафарга етди. Мамлакат расмийлари маълумотига кўра, 16,7 мингдан ортиқ киши жароҳатланган, қарийб 18 минг нафар аҳоли эса уй-жойидан айрилган.

Фото: REUTERS

Венесуэлада 24 июн куни кечқурун содир бўлган икки кучли зилзила оқибатида ҳалок бўлганлар сони 5 069 нафарга етди. Бу ҳақда мамлакат Миллий ассамблеяси раиси Хорхе Родригес маълум қилди.

Расмий маълумотларга кўра, табиий офат натижасида 16 740 нафар киши турли даражада жароҳат олган, 17 907 нафар фуқаро эса ўз уйидан айрилган. Шунингдек, қутқарувчилар томонидан 6 462 нафар одам топилган, қарийб 37 минг нафар жабрланганга тиббий ёрдам кўрсатилган.

Ҳокимият маълумотига кўра, зилзила оқибатида 190 та бино бутунлай вайрон бўлган, яна 856 та иншоотга жиддий зарар етган.

Мутахассислар ушбу ҳодисани «сейсмик дуплет» деб баҳоламоқда. Дастлаб магнитудаси 7,2 бўлган зилзила қайд этилган, бир дақиқадан ҳам кам вақт ўтиб эса магнитудаси 7,5 бўлган иккинчи кучли силкиниш содир бўлган.

Биринчи зилзиланинг эпицентри Кариб денгизи соҳилида жойлашган Морон шаҳридан ғарб томонда, Каракасдан тахминан 168 километр узоқликда қайд этилган. Ерости силкинишининг ўчоғи 13 километр чуқурликда бўлган. Кейинги зилзиланинг эпицентри эса Морондан 16 километр масофада, 10 километр чуқурликда жойлашган.

Миллий ассамблея раиси Хорхе Родригеснинг таъкидлашича, ҳалок бўлганларнинг катта қисми мамлакатнинг соҳилбўйи ҳудудларига тўғри келади. Уй-жойидан айрилган минглаб одамлар вақтинчалик лагерларга жойлаштирилган. Халқаро ахборот агентликлари маълумотига кўра, ушбу лагерларнинг кўпчилигида ичимлик суви ва санитария шароитлари етарли эмас.

Зилзила оқибатларини бартараф этиш ишларини молиялаштириш учун Венесуэла ҳукумати Халқаро валюта жамғармаси (ХВЖ)даги ўз ресурсларидан 346 миллион доллар маблағни йўналтирган. Бу ҳақда мамлакат президенти вазифасини бажарувчи Делси Родригес маълум қилди.

1 июл куни Венесуэлада зилзила қурбонлари хотирасига етти кунлик миллий мотам эълон қилинган эди. Ўшанда расман тасдиқланган ҳалок бўлганлар сони тахминан 2 300 нафарни ташкил этган.

Делси Родригес ўзининг ижтимоий тармоқдаги саҳифасида мамлакат оғир йўқотишни бошидан кечираётганини таъкидлаб, ҳалок бўлганларнинг оилаларига ҳамдардлик билдирган ҳамда жароҳатланганлар, бедарак йўқолганлар ва табиий офатдан жабрланганлар учун дуо қилишга чақирган.