BM: Германиядаги айрим компаниялар маҳсулоти Россияга етиб борган бўлиши мумкин

Berliner Morgenpost газетаси ЕИ санкцияларига қарамай, Германиянинг икки компанияси — Гёттингенда (Қуйи Саксония) ўлчов ускуналари ишлаб чиқарувчи Mahr ва Зауэрлахдаги (Бавария) машинасозлик фабрикаси Spinner — Москвада ўтказилган “Металлообработка 2025” кўргазмаси каталогига киритилганини аниқлаган. Berliner Morgenpost (BM) нашрининг бу ҳақдаги мақоласи немис газетаси сайтида шанба, 3 январ куни жойланган.

Mahr компанияси кўргазма каталогига Россиядаги Mahr Service фирмаси билан боғлиқ ҳолда киритилган: у ўз сайтида Mahr логотипидан фойдаланади ва Mahr ускуналарини етказиб бериш ҳамда таъмирлашини маълум қилади. Mahr вакили нашрга Россиядаги бу компания ҳақида ҳеч нарса билмаслигини айтган.

Бундан ташқари, каталогда станоклар ишлаб чиқарадиган ва кўп йиллардан бери Spinner билан ҳамкорлик қилишини айтган Хитойдаги Eumaspinner компанияси ҳам тилга олинади. BM тахминича, ушбу фирма Spinner савдо белгисини ноқонуний тарзда ишлатиши мумкин.

Украина Иқтисодий хавфсизлик кенгаши ҳисоботидан келиб чиқишича, 2024 ва 2025 йилларда Россия импорти маълумотлар базасида Mahr, Spinner ва Германиянинг саноат гиганти Siemens номларини ҳам учратиш мумкин бўлган.

Нашр маълумотига кўра, ушбу уч компания маҳсулотлари РФга 8 млн евродан ортиқ суммада кириб келган бўлиши мумкин. Фақат Mahr бўйича ҳисоботда 161 та ёзув қайд этилган: Россия 2,2 млн евро қийматда микрометрлар ва бошқа ўлчов асбобларини олган, базада ишлаб чиқарувчи сифатида Mahr кўрсатилган. Тахмин қилинган етказиб беришлар Хитой, Туркия, БАА ва бошқа давлатлар компаниялари орқали амалга оширилган бўлиши мумкин. Шу билан бирга, Mahr сўровга жавобан эҳтимолий етказиб беришлар ҳақида ҳеч нарса билмаслигини билдирган.

Spinner эса маълумотлар базасида 16 марта тилга олинган. Тахмин қилинган етказиб беришлар 2023 йилда ишлаб чиқарилган станоклар, шунингдек ишлатилган ускуналарни ҳам ўз ичига олади. Уларнинг умумий қиймати — тахминан 6,8 млн евро. BM ёзишича, бундай етказиб беришлар Хитой, Туркия ва Ҳиндистон компаниялари орқали амалга оширилган бўлиши мумкин.

Шу билан бирга, Spinner’нинг ўзи маҳсулотини Россияга на бевосита, на учинчи шахслар орқали етказиб бермаслигини айтган. Компания контрагентларни синчковлик билан текширади ва қайта сотишни тақиқлайди. Spinner, шунингдек, GPS-кузатув тизими орқали қурилмалари Россияга тушиб қолган-қолмаганини аниқлаш ва шундай ҳолатда уларни масофадан туриб ўчириб қўйиш мумкинлигини қўшимча қилган.

Mahr ва Spinner Россияга импорт ҳақидаги даъволарни “дезинформация” деб атаган ва “Металлообработка” кўргазмасида иштирок этмаганини айтган. Die Berliner Morgenpost’нинг ёзишича, эҳтимол, ҳар икки компания ҳам ўз маҳсулоти РФга тушиб қолган бўлиши мумкинлигидан бехабар.

Нашр маълумотига кўра, 2024–2025 йилларда Хитой ва Туркиядан Россияга Siemens’нинг Чехиядаги шуъба корхонаси Siemens Electric Machines S.R.O. ишлаб чиқарган тўртта двигател етказиб берилган. Журналистлар сўровига Siemens томонидан берилган жавобда унинг маҳсулоти РФга кириб келмаётгани айтилган.

BM ёзишича, тахмин қилинган етказиб беришлар Хитой, Туркия, БАА ва Европа Иттифоқига кирмайдиган бошқа давлатлар компаниялари орқали амалга оширилган бўлиши мумкин. Уларга Россиянинг Украинада бошлаган уруши муносабати билан жорий этилган ЕИ санкция чекловлари татбиқ этилмайди. Шу билан бирга, журналистлар таъкидлашича, немис компаниялари ўз маҳсулоти шу йўл билан Россияга тушиб қолганини билиши шарт эмас.

Нашр аниқлашича, эҳтимолий ҳарбий қўлланиши сабаб ўлчов асбоблари ва станоклар ЕИ санкция рўйхатларига икки хил мақсадда қўлланадиган товарлар (dual-use) сифатида киритилган.

Украина Иқтисодий хавфсизлик кенгаши вакили Сашко Адамлюкнинг айтишича, Европа Иттифоқи ўз қабул қилган санкцияларига риоя этилишини таъминлашда жуда заиф. “Муаммо ҳам шу ерда: Европада назорат ўрнатиб, текширув ўтказа оладиган кучли тузилма йўқ”, — дея унинг сўзларини келтиради Die Berliner Morgenpost.

https://www.dw.com/ru/bm-produkcia-rada-kompanij-iz-frg-mogla-popadat-v-rf-v-obhod-sankcij/a-75384474