РФ Мудофаа вазирлиги: 10 соат ичида Россия узра 294 та дрон уриб туширилди

Россия якшанба, 4 январ куни Украина Қуролли кучлари дронларининг оммавий ҳужумига учради, бу ҳақда РФ Мудофаа вазирлиги баёнотларида айтилган. Идора мамлакат ҳудуди устида 13:00 дан 20:00 гача бўлган вақт оралиғида 253 та дрон, 20:00 дан 23:00 гача эса 41 та учувчисиз қурилма уриб туширилгани ҳақида ҳисобот берди.

Украинадан учирилган дронларнинг аксар қисми Брянск ва Белгород вилоятлари устида уриб туширилган — мос равишда 86 ва 57 тадан. РФнинг Украинадан энг узоқ ҳудуди сифатида Владимир вилояти қайд этилган: Мудофаа вазирлиги хабарига кўра, у ергача 3 та дрон етиб келган. Твер вилояти устида иккита дрон уриб туширилган.

Бу 4 январ куни Мудофаа вазирлиги хабар берган биринчи дронлар ҳужуми эмас — тушгача ҳам идора 140 та украин дрони уриб туширилгани ҳақида ҳисобот берган эди.

РФ Мудофаа вазирлиги фақат уриб туширилган дронлар ҳақида ҳисобот берди, лекин ердаги оқибатлар ҳақида айтмади. Айни пайтда, Липецк вилоятидаги Елец шаҳри аҳолиси ва ОАВ “Энергия” АЖ корхонаси ҳужумга учрагани ва у ерда ёнғин чиққани акс этган кадрларни эълон қилмоқда. Буни Astra нашрининг OSINT-таҳлили ҳам тасдиқлайди. Кейинроқ ҳудуд губернатори Игор Артамонов Елецнинг “саноат ҳудуди”даги “ёниш” ўт ўчирувчилар томонидан маҳаллийлаштирилгани ҳақида ҳисобот берди. “Дастлабки маълумотларга кўра, ҳалок бўлганлар ва жабрланганлар йўқ”, — деб ёзди у 5 январга ўтар кечаси Telegram’да.

Кадрларда корхона ҳудудидан кўтарилаётган катта тутун булутлари кўринади. Ҳужум оқибатларининг тафсилотлари номаълум. Липецк вилояти губернатори Игор Артамонов кун давомида фақат ҳудуд бўйича ҳаво ҳужумидан огоҳлантириш режими жорий этилиши ва бекор қилиниши ҳақида хабарлар билан чекланди.

Очиқ маълумотларга кўра, “Энергия” АЖ маиший ва умумсаноат техникаси учун кимёвий ток манбалари — хусусан, батарея ва аккумуляторлар ишлаб чиқаришга ихтисослашган. Россиядаги “Судпром” АНО маълум қилишича, “Энергия” ракета-артиллерия мажмуалари, авиация, ҳарбий-денгиз флоти, фуқаролик дарё ва денгиз флоти ҳамда радиотехника учун қувват манбаларини ишлаб чиқаради.

Astra ёзишича, Липецк вилоятидаги мазкур заводда бошқа маҳсулотлар қатори Россия дронлари учун аккумуляторлар ҳам ишлаб чиқарилади. РФнинг Украинага кенг кўламли ҳужуми бошланганидан бери корхона бир неча бор дрон ҳужумларига учраган, аммо бу завод ишига жиддий таъсир кўрсатмаган.

Дронлар ҳужуми натижасидаги зарарлар ҳақида Курск вилояти ҳокимияти хабар берди. Губернатор Александр Хинштейннинг айтишича, бир дрон Плевицкая шоҳкўчасидаги янги қурилаётган уйга урилган. Ўша пайтда қурилиш майдонида ҳеч ким бўлмагани учун жабрланганлар бўлмаган, дея аниқлик киритди у.

Москва томон учиб келаётган кўплаб дронлар уриб туширилгани ҳақида Россия пойтахти мэри Сергей Собянин ҳам ҳисобот берди. Кун давомидаги ҳар бир шундай постга у “фавқулодда хизматлар мутахассислари парчалар тушган жойда ишламоқда” деган ибора ёзиб борган, аммо ердаги зарарлар ҳақида тафсилот келтирмаган. РФ Мудофаа вазирлиги Москва вилояти устида 46 та дрон уриб туширилганини маълум қилди.

Кун давомида Москвада аэропортлар вақтинча ишини тўхтатган. Хусусан, Внуково халқаро аэропорти бир кунда икки марта чекловлар жорий этилганини хабар қилди. Маҳаллий вақт билан соат 20:00 га келиб аэропорт иши одатий режимга қайтишни бошлаган.