АҚШ БМТ Яшил иқлим фондидан чиқди

АҚШ Молия вазирлиги зудлик билан БМТ Яшил иқлим фондидан чиқишини эълон қилди. Вашингтон ташкилотни молиялаштиришдан бош тортди.

АҚШ молия вазири Скотт Бессент Яшил иқлим жамғармасини «радикал ташкилот» деб атади. Унинг сўзларига кўра, жамғарманинг мақсадлари «арзон ва ишончли энергия иқтисодий ўсиш ва қашшоқликни камайтириш учун фундаментал аҳамиятга эга» деган ҳақиқатга зиддир.

Вазирликнинг қайд этишича, АҚШ президенти Доналд Трамп маъмурияти иқтисодиётнинг ўсишига ёрдам берадиган барча энергия манбаларини ривожлантириш ниятида.

«Яшил иқлим фондида бундан буён ҳам иштирок этиш Трамп маъмуриятининг устуворликлари ва мақсадларига мос келмаслиги тан олинди», дейилади хабарда.

Яшил иқлим жамғармаси (Green Climate Fund) – БМТ Доиравий конвенцияси томонидан ташкил этилган глобал иқлим жамғармаси. Унинг фаолияти иқлим ўзгариши муаммоларини ҳал қилишда мамлакатларни қўллаб-қувватлашга қаратилган.

Аввалроқ Трамп АҚШ 66 та халқаро ташкилотдан чиқиши тўғрисидаги меморандумни имзолаган эди. Шундан 31 таси БМТ тузилмаларидир. Оқ уйнинг аниқлик киритишича, ташкилотлар «энди Америка манфаатларига хизмат қилмаяпти».

2025 йил сентябрида Трамп БМТни дунё можароларини ҳал қилишда ҳаракатсизликда айблади. Унинг сўзларига кўра, халқаро ташкилот фақат «жуда кескин иборалар билан» хатлар ёзади, кейинчалик уларни амалга оширмайди.