Мерц: ЕИнинг ҳеч бир давлати ҳозир Украинага аскар юборишни режалаштирмаяпти

Германия ҳукумати раҳбари европалик кучларнинг давом этаётган урушга кириши ҳақида гап бораётгани йўқлигини алоҳида таъкидлади. “Биз ўт очиш тўхтатилгандан кейинги хавфсизлик кафолатлари ҳақида гапиряпмиз”, — дея тушунтирди Фридрих Мерц. У қўшимча қилишича, Европа Иттифоқидаги ҳеч бир давлат ҳозирнинг ўзида Украинага аскар юборишни режалаштираётганини айтмаяпти.

“Бу урушга барҳам бериш учун имкон борича ҳамма нарса қилинмоқда, — деди Мерц. — Аммо бу ҳолатда гап фақат тинчликни ҳарбий жиҳатдан таъминлаш, ўт очишни тўхтатиш тўғрисидаги келишув ҳақида кетяпти”. Канцлер Германия ўз хавфсизлик кафолатларини, жумладан Бундесвер иштирокини таъминлаш орқали ҳам, киритишга тайёр эканини билдирди.

Мерцнинг сўзларига кўра, Украинага хавфсизлик кафолатлари доирасида Бундесверни қандай аниқ шаклда жалб этиш масаласи фақат унинг шахсий қароригa боғлиқ эмас. Бунинг учун ҳукумат қарори ҳам, Бундестаг мандати ҳам зарур. “Мен коалиция ичида, зарурат туғилса, қайси йўлни танлашга тайёрлигимиз борасида ўзаро тушунишга келишимизни истайман”, — деди у.

Шу куннинг ўзида РФ Ташқи ишлар вазирлиги “кўнгиллилар коалицияси” томонидан Украинага хавфсизлик кафолатлари бўйича декларация қабул қилинганини, шунингдек Украина, Франция ва Буюк Британиянинг Украинада француз ва британ қўшинларини жойлаштириш эҳтимоли ҳақидаги келишувини кескин қоралаган эди. Москва бундай бўлинмаларни ва Украинадаги ғарб ҳарбий объектларини “хорижий интервенция” ҳамда РФ армияси учун “қонуний ҳарбий нишонлар” сифатида кўради, деб маълум қилди Россия идораси.

Парижда “кўнгиллилар коалицияси” учрашувида Мерц Украинада ўт очиш тўхтатилган тақдирда Германия принципиал жиҳатдан немис ҳарбийларини халқаро тинчликпарвар кучлар таркибига киритишга тайёр эканини айтган. Бироқ у таъкидлашича, дастлаб улар Украинага қўшни бўлган НАТО давлат ҳудудида жойлаштирилади. Шу билан бирга, у немис бўлинмаларини бевосита Украина ҳудудида ҳам жойлаштириш эҳтимолини истисно қилмаган.