Хавфлилик даражаси енгил бўлган пиротехника буюмларига рухсат берилади

«Пиротехника буюмларининг муомаласи тўғрисида»ги қонун қабул қилинди.

Қонунга кўра, пиротехник таркибнинг ёниши (портлаши) ёрдамида оптик, акустик, электр ва бошқа визуал эффектларни ҳосил қилиш учун мўлжалланган қурилмалар пиротехника буюмларидир.

Пиротехника буюмлари уларнинг хавфлилик зонаси, шу жумладан атроф-муҳитнинг зарарланиш даражасидан келиб чиқиб, хавфлиликнинг I–V синфларига бўлинади.

Ўзбекистонда хавфлиликнинг I синфига кирувчи пиротехника буюмларини (бенгал чироқлари, қарсилдоқ, тортлар учун кичик фонтанлар) жисмоний ва юридик шахслар томонидан ишлаб чиқариш, тайёрлаш, Ўзбекистон ҳудудига олиб кириш, ташиш, ўтказиш, сотиб олиш, сақлаш ва улардан фойдаланишга рухсат берилади.

Шу билан бирга, хавфлиликнинг II–V синфларига кирувчи пиротехника буюмларини ишлаб чиқариш, тайёрлаш, Ўзбекистон ҳудудига олиб кириш, ташиш, жўнатиш, ўтказиш, сотиб олиш, сақлаш ва улардан фойдаланиш тақиқланади.

Пиротехника буюмларининг муомаласи устидан давлат назорати Миллий гвардия, ички ишлар ва божхона органлари томонидан амалга оширилади.

Қонун расмий эълон қилинган кундан эътиборан 3 ой ўтгач кучга киради.

Ўзбекистонда пиротехника буюмларининг ноқонуний айланмаси ва улардан фойдаланганлик учун катта миқдордаги жарималар билан маъмурий жавобгарлик кўзда тутилган, ўта оғир ҳолатларда эса жиноий жавобгарлик қўлланилиши мумкин.