Афғонларнинг ярмидан кўпининг Германияга кириш рухсатномалари бекор қилинди

Германиядаги ҳозирги ҳукумат ҳокимиятга келганида, 2300 дан ортиқ афғон Берлин ўз ваъдасига мувофиқ уларни қабул қилади, деб умид қилган эди. Аммо уларнинг кўпчилигига Германияга киришга рухсат берилмади.

Фото: Freepik

Покистонда яшаётган ва аввалги Германия ҳукумати томонидан ГФРга кириш ваъда қилинган 2308 нафар афғондан деярли ҳар иккинчисига кириш рад этилган. Бу ҳақда Германия ҳукуматининг Сўл партия депутатларининг парламент сўровига жавобида айтилади, деб хабар берди 20 январ, сешанба куни Neue Osnabrücker Zeitung газетаси.

Нашр маълумотларига кўра, 2025 йил май ойида ҳозирги федерал ҳукумат иш бошлагандан кейин Германияга 788 нафар афғон етиб келган, яна тахминан 410 киши эса Покистондан чиқиб кетиш жараёнида.

ХДИ/ХСИ консерватив блоки ва Германия Социал-демократик партияси (ГСДП)дан иборат янги ҳукумат ҳокимиятга келгач, Афғонистондан келувчиларни қабул қилиш дастурларини тўхтатган. Хабар қилинишича, сўнгги ҳафталарда Покистондан кириш рухсатига эга бўлган бир неча юз нафар афғон Германияга учиб келган, аммо улар хавфсизлик текширувидан ўтиши керак бўлган. Шу билан бирга, юзлаб афғонларга, аксинча, кириш бутунлай рад этилган.

Сўл партиянинг қочқинлар сиёсати бўйича вакили Клара Бюнгер ҳукумат ҳаракатларини кескин танқид қилди.

“Германия кириш ваъда қилинган ва хавф остида бўлган афғонларнинг ярмини шунчаки ташлаб қўйиш — масъулиятсизлик, номақбул ва ахлоқан йўл қўйиб бўлмайдиган ҳолат”, — деди у Neue Osnabrücker Zeitung нашрига.

Бюнгер таъкидлашича, бу афғонлар бир неча йил давомида Германия кўмагида Покистонда турар жой ва парвариш билан таъминланган, Германияга кўчиб ўтишни кутиб яшаган. Унинг фикрича, Берлин бу одамлар олдидаги жавобгарликдан воз кечиб, уларни “инсонпарварликка зид ва аёлларга нисбатан тажовузкор режим ихтиёрига ташлаб қўйишга ҳақли эмас”.

Тайёрлаган: Отабек Матназаров

#Германия #Афғонистон