“Ер гўзали 2025” танловида қатнашган ўзбекистонлик қиз либосида давлат рамзларидан фойдалангани учун жаримага тортилди

Тошкентда давлат рамзларига ҳурматсизлик қилган қиз маъмурий жазога тортилди. Kun.uz суд ҳужжати билан танишди.

Суд қарорида келтирилишича, 2004 йил Фарғона вилоятида туғилган Ш. 2025 йил 28 октябр куни Филиппиннинг Манила шаҳрида ўтказилган “Ер гўзали 2025” кўрик-танловида иштирок этган. У танловда Ўзбекистон Республикаси давлат байроғи ҳамда герби тасвирланган либосда қатнашган. Ушбу либосда тушган суратини эса ижтимоий тармоқдаги ўз саҳифасига жойлаштирган.

Ш. судда айбига қисман иқрорлик билдирган.

“Манила шаҳрида 25 йилдан буён дунё бўйлаб ўтказиб келинаётган “Ер гўзали 2025” кўрик-танловида иштирок этдим. Ушбу танловда Ўзбекистон Республикаси давлат байроғи ҳамда гербидан илҳомланиб, либос тиктирдим. Бироқ либосимда давлат байроғида мужассам бўлган ранглар кетма-кетлиги бўлгани билан унда тасвирланган ярим ой ва 12 юлдуз йўқ”, деган у судда.

Қиз суддан ўзига нисбатан енгиллик сўраган.

ЖИБ Миробод туман судининг 2026 йил 19 январдаги қарори билан Ш. Маъмурий жавобгарлик тўғрисидаги кодекснинг 203-1-моддаси 1-қисмида назарда тутилган ҳуқуқбузарликни (давлат рамзлари тўғрисидаги қонунчиликни бузиш) содир қилишда айбли деб топилди. Унга БҲМнинг 2 баравари (824 минг сўм) миқдорида жарима жазоси тайинланди.

Аввалроқ ўзбек сўмини ёқиб, оловида тамаки тутатган хорижлик ишчилар маъмурий жазога тортилганди.