Жанубий Кореянинг собиқ бош вазири Хан Док Су исён иши бўйича 23 йилга қамалди

Сеул марказий туман суди Жанубий Кореянинг собиқ бош вазири Хан Док Суга ҳарбий ҳолат жорий этишга уриниш иши бўйича 23 йиллик қамоқ жазосини тайинлади, деб ёзди The Korea Herald.

Гап 2024 йил декабр ойида собиқ президент Юн Сок Ёл мамлакатни «Шимолий Корея коммунистик кучлари таҳдидидан» ҳимоя қилиш зарурлигини айтиб, ҳарбий ҳолат эълон қилган сиёсий инқироз ҳақида кетмоқда. Прокуратуранинг таъкидлашича, Хан Док Су ушбу қарордан олдин ҳам, кейин ҳам амалга оширилган ҳаракатларга ёрдам берган.

Суд Хан Док Суни собиқ президентга ёрдам берганликда айбдор деб топиб, содир бўлган воқеани исён деб баҳолади. Бундан ташқари, собиқ бош вазир ҳарбий ҳолат тўғрисидаги фармонни 6 декабр куни - у амалда эълон қилинганидан уч кун ўтиб - сохталаштириб имзолагани ва орқа сана билан бу қадамни қонунийлаштиришга урингани аниқланди.

Шунингдек, суд Хан Док Су собиқ президент импичменти бўйича суд жараёнида гўёки фармон борлигини билмагани ҳақида ёлғон кўрсатма бергани исботланган деб ҳисоблади.

Махсус прокурор 15 йил қамоқ жазосини тайинлашни талаб қилган бўлса-да, суд қаттиқроқ жазо тайинлади. Хан Док Сунинг ўзи барча айбловларни рад этиб, ҳарбий ҳолат жорий этиш режаларидан бехабарлигини таъкидлади. Ҳукм эълон қилингандан сўнг, у суд залида ҳибсга олинди.

Хан Док Су бир неча бор бош вазир лавозимини эгаллаган: 2006 йилда вақтинча, кейин 2007 йилдан 2009 йилгача, шунингдек, 2022 йилда парламентга сайланганидан кейин. Ҳарбий ҳолат парламент томонидан бекор қилиниб, Юн Сок Ёлга импичмент эълон қилинганидан сўнг айнан Хан Док Су президент вазифасини бажарувчи бўлган эди.

Кейинчалик Юн Сок Ёл бир қатор жиноий ишлар бўйича судланди ва яқинда прокуратура унга ўлим жазосини талаб қилди.

2024 йил декабр ойи охирида Хан Док Суга ҳам импичмент эълон қилинди - у Юн Сок Ёл ишини тергов қилиш учун Конституциявий суднинг қўшимча судяларини тайинлашдан бош тортгани учун. Бироқ, 2025 йил март ойида суд импичментни бекор қилди ва уни президент вазифасини бажарувчи лавозимига тиклади. Май ойида у истеъфога чиқди, июн ойида эса Ли Чжэ Мён янги давлат раҳбари бўлди. Август ойида Хан Док Су исёнга ёрдам берганликда айбланди, бироқ ҳукм чиқарилгунга қадар озодликда қолган эди.