Испанияда йўқолиб қолган мушук беш ойда 250 километр йўл босиб уйига қайтди

Хабар қилинишича, мушук ўтган йил августида йўқолиб қолган.

Фото: Patrick Sire

Филу лақабли мушук 250 километр йўл босиб Испаниядан Францияга қайтиб келди, деб ёзади France Info.

Хабар қилинишича, мушукнинг эгалари Эвелин ва Патрик Сир ёзда фарзандлари билан Испанияда дам олган ва ўтган йил августида ўзлари яшайдиган Олонзак коммунасига қайтишган.

Оила йўлда бензин қуйиш учун тўхтаган ва Филу машинадан тушиб қолган. Улар буни кейинроқ пайқашган ва бензин қуйиш шохобчасига қайтиб боришган, лекин мушук топилмаган.

Орадан беш ой ўтгач, уларга Олонзак коммунасида яшайдиган Элен исмли аёл қўнғироқ қилган. Аёлнинг сўзларига кўра, у Филуни 9 декабр куни ҳовлисида топиб олиб, парвариш қила бошлаган. Бир куни мушук йўталаётганини кўргач, уни ветеринарларга олиб борган. Ветеринарлар мушукни кўздан кечириш чоғида унга ўрнатилган чипни кўришган ва ушбу чипдаги маълумотлар орқали Элен Эвелин ва Патрик билан боғланган.

Мушук бунча масофани қандай босиб ўтгани номаълум.