Юзлаб дронлар ва авиабомбалар: Зеленский — Россиянинг бир ҳафталик зарбалари ҳақида

Ўтган ҳафта давомида Россия қўшинлари Украина ҳудудига 1700 дан ортиқ зарба дронлари, 1380 дан зиёд бошқариладиган авиабомба ва турли турдаги 69 та ракета учирган, деб хабар қилди Владимир Зеленский якшанба, 25 январ куни. Украина президентининг сўзларига кўра, РФ зарбаларининг асосий нишонлари энергетика ва муҳим инфратузилма объектлари, шунингдек турар жойлар бўлган.

“Россиянинг ҳар бир оммавий ҳужуми вайронкор бўлиши мумкин. Шунинг учун ҲҲМ тизимлари учун ракеталар бизга ҳар куни керак, ва биз осмон ҳимоясини кучайтириш учун Америка ва Европа билан ишлашда давом этяпмиз”, — дея таъкидлади у.

Зеленский, шунингдек, Вилнюсга ташрифи чоғида минтақадаги шериклар — Литва ва Полша билан позицияларни мувофиқлаштиришини билдирди. “Украинани кучайтириш учун ҳар бир етакчи билан ишлаяпмиз. Ҳамма Россиядан келаётган таҳдид қандай эканини аниқ англаши керак, ва буни энг яхши тушунадиганлар — айнан халқларимиз”, — дея қўшимча қилди Украина раҳбари.

25 январга ўтар кечаси Украина РФ томонидан навбатдаги ўққа тутишларга дуч келди. Украина Қуролли кучлари (УҚК) Ҳаво кучлари маълумотига кўра, Россия қўшинлари Украина ҳудудларига икки та “Искандер-М” баллистик ракетаси ва 102 та зарба берувчи учувчисиз аппаратни учирган. УҚК маълумотига кўра, 87 та дрон уриб туширилган, бироқ 15 та ҳужумкор дрон ўнта турли жойда нишонга теккан ҳолатлар ҳам қайд этилган.

Бундан бир кун олдин Россия қўшинлари Украинани оммавий ўққа тутган. РФ 370 дан ортиқ ҳужумкор дронлар ва турли турдаги 21 та ракетани ишга солган бу катта ҳужум 23–24 январ кунлари Абу-Дабида АҚШ воситачилигида Украина ва Россия ўртасида урушни эҳтимол тўхтатиш бўйича музокаралар бўлиб ўтаётган пайтда амалга оширилган.

24 январ кунги ҳужумнинг асосий нишонларидан бири Киев бўлган: РФ яна муҳим инфратузилма объектларига зарба берган. Бу зарбалар натижасида Украина пойтахтида тахминан 6000 та турар жой иссиқликсиз қолган. Шаҳар мэри Виталий Кличко қайд этганидек, уларнинг кўпчилигини 9 ва 20 январ кунлари бўлган ўққа тутишлардан кейин аллақачон икки марта иссиқлик таъминотига улашган ёки улашга уринишган.

Украина пойтахтига қилинган бир қатор Россия ҳужумларидан кейин Киевдаги вазият оғирлигича қолмоқда. Виталий Кличко кўп қаватли уйларнинг асосий қисми марказлашган иссиқлик тармоғига қайта уланганига қарамай, 1676 та уй ҳали ҳам иссиқликсиз эканини маълум қилди.

Фақат январ ойининг ўзида Россия Украинага камида уч марта оммавий ҳужум уюштирган бўлиб, бу мамлакат бўйлаб шаҳарлардаги турар жойларда иссиқлик, электр ва сув таъминотида катта муаммоларга сабаб бўлган.

9 январ кунги биринчи ҳужумдан кейин фақат Киевнинг ўзида шаҳар кўп қаватли уйларининг ярмидан кўпроғи — 6000 дан зиёд уй иссиқлик таъминотисиз қолган. Украина пойтахти мэри Виталий Кличко энергетик инқироз фонида фуқароларни шаҳар ташқарисига, “муқобил электр ва иссиқлик манбалари бор жойларга” чиқиб кетишга чақирган.

20 январга ўтар кечаси РФ Киевдаги энергетика инфратузилмаси объектларига яна зарба берган. Кличконинг сўзларига кўра, ўша вақтга келиб ҳам шаҳарда 9 январ ҳужумидан кейин иссиқликсиз қолган барча уйларга иссиқликни қайтаришга улгуришмаган эди. Янги ҳужум оқибатлари ҳам деярли шунга тенг бўлган: 5635 та кўп қаватли уй иссиқликсиз қолган. Вазиятни об-ҳаво шароити ҳам қийинлаштиряпти — январ ойида Киевда совуқ бўлган, ҳаво ҳарорати минус 17 даражагача тушган.

Украинага қарши бошланган кенг кўламли уруш давомида РФ Мудофаа вазирлиги Украина энергетик инфратузилмаси объектларига зарбалар бераётганини тан олади, бироқ уларнинг мақсади мамлакатнинг ҳарбий-саноат мажмуаси ишини издан чиқариш, деб даъво қилади. Кремл ҳам Россия армияси қиш фаслида Украина энергетикасига ҳужум қилаётганини тан олган: РФ президенти матбуот котиби Дмитрий Песков бу борада тинч аҳолида иссиқлик йўқлиги — Киев гўёки “музокараларга чиқишни истамагани”нинг “оқибати”, деб айтган.