Аҳолини рўйхатга олиш бўйича мажбурий топшириқ берган ҳокимликлар огоҳлантирилди

Ўзбекистонда қатор маҳаллий ҳокимликлар томонидан «мажбурий топшириқ» ниқоби остида ходимларни мажбурий меҳнатга жалб эиш ҳолатлари аниқланди, дея хабар бермоқда Меҳнат инспекцияси матбуот хизмати.

Сўнгги кунларда айрим маҳаллий ҳокимлар томонидан ходимларни аҳолини рўйхатдан ўтказиш тадбирларига иш вақтидан ташқари пайтда мажбуран жалб этиш ҳолатлари учрамоқда.

Инспекция ходимнинг розилигисиз, босим, топшириқ ёки «мажбурий топшириқ» ниқоби остида иш вақтидан ташқари ишларга жалб этиш мажбурий меҳнат ҳисобланиши ва бу қонун бузилиши ҳисобланишини таъкидлаган.

Шу туфайли Бухоро шаҳри, Олтинкўл, Асака ва Марҳамат туманлари ҳокимликларига бу каби ҳолатлар юзасидан огоҳлантиришлар юборилди. Андижон вилояти ҳокимлигига қонун бузилиши ҳолатларини бартараф этиш юзасидан тақдимнома киритилган.

Инспекция, шунингдек, иш вақтидан ташқари иш фақат ходимнинг ихтиёрий розилиги билан амалга оширилиши ҳамда бунинг учун ҳақ тўлаш Меҳнат кодексининг 262-моддасига мувофиқ мажбурий эканини билдирди.

Иш вақтидан ташқари иш учун ҳақ тўлаш тартиби:

• бир кундаги дастлабки 2 соат – камида 1,5 баравар;
• 2 соатдан ортиқ – камида 2 баравар;
• ноқулай меҳнат шароитида – ҳар бир соати учун камида 2 баравар.