Зеленский: Энергетикага зарба бермаслик бўйича “энергетик сулҳ” ишга тушди

Украина Россиянинг энергия инфратузилмасига зарбалар беришдан тийилиб туришга тайёр. Бу ҳақда Украина президенти Володимир Зеленский жума куни, 30 январдаги кечки видеомурожаатида маълум қилди.

“Америка томони энергетикага зарба бермаслик ҳақида бир ҳафтага келишув борлигини айтганди, ва бугунга ўтар кеча ҳисоб бошланди. Албатта, бунинг қандай кечиши шерикларга — асосан АҚШга боғлиқ. Украина зарбалардан тийилиб туришга тайёр, ва бугун биз Россиянинг энергия объектларига зарба бермадик”, — деб таъкидлади Зеленский.

У бундан бир кун олдин Украина ва Россия ўртасида қиш совуқлари даврида “энергетик сулҳ” бўйича келишувларга эришилганини ҳам тасдиқлаган эди.

Украина раҳбари қайд этишича, РФ қўшинлари 30 январдан бери энергия объектларига деярли зарба бермаган — Донецк областидаги газ инфратузилмасига авиабомбалар орқали битта зарба қайд этилган, холос.

“Шунингдек, ҳозир биз Россия зарбаларининг логистикага, узел станцияларига қайта йўналтирилаётганини кўряпмиз. Хусусан, "Укрзализныця"нинг вагонларидан бири — махсус вагон-электростанция нишонга олинди, бу Днипро областида эрталаб содир бўлди”, — деди Зеленский.

Шу орада, Россия президенти матбуот котиби Дмитрий Песков 30 январ куни Доналд Трамп Владимир Путиндан “музокаралар учун қулай шарт-шароит яратиш мақсадида” Киевга зарбалар беришдан тийилишни сўраганини тасдиқлади.

Бироқ Песковнинг иддаосига кўра, гап фақат 1 февралгача бўлган муддат ҳақида кетган. Ҳолбуки, Трамп 29 январда Путин Украина шаҳарларини кейинги етти кун давомида ўққа тутмасликка рози бўлганини айтган эди.

30 январ куни Трамп Овал кабинетда журналистларга, унинг фикрича, Россиянинг Украинага қарши уруши бўйича ўт очишни тўхтатишга оид келишув имзоланишига “яқин қолганини” билдирди. Шу билан бирга, Америка раҳбари ҳеч қандай тафсилот келтирмади, деб хабар қилади Reuters.

Reuters маълумотига кўра, Россия президентининг хорижий мамлакатлар билан инвестиция-иқтисодий ҳамкорлик бўйича махсус вакили, Россия тўғридан тўғри инвестициялар жамғармаси раҳбари Кирилл Дмитриев 31 январ куни Майамига АҚШ президенти маъмурияти аъзолари билан учрашувлар учун йўл олади.

Украина президенти офисининг маслаҳатчиси Виктория Страхова Россия Қуролли кучларида Киев шаҳри, Киев вилояти ва бутун Украина бўйлаб инфратузилма объектларини ўт очиб йўқ қилиш тақиқлангани ҳақида ахборот келиб тушганини маълум қилди. Унинг сўзларига кўра, бу тақиқ 29 январ соат 07:00 дан кучга кирган. Бу маълумотни украин махсус бўлинмаси Kraken командири Константин Немичев ҳам тасдиқлаган.

Шу билан бирга, кузатувчилар Россия томонида қурол-яроғ захиралари камайиб бораётган бўлиши мумкинлигини таъкидламоқда. 24 январ кунги ўққа тутишдан кейин топилган парчаларни ўрганиш чоғида 2026 йилда ишлаб чиқарилган Х-101 ракета фрагментлари ҳам аниқланган. Таҳлилчилар фикрича, бу Москва олдиндан йиғиб қўйилган захираларни тугатганини ва узоқ масофали ракеталардан фойдаланишни энди жорий ишлаб чиқариш қувватлари билан чеклашга мажбур бўлаётганини кўрсатиши мумкин.