Трампга суиқасд қилишда айбланган шахс умрбод қамоқ жазосини олди

АҚШ Федерал суди Доналд Трампга суиқасд қилишга уриниш иши бўйича Райан Раутни умрбод қамоқ жазосига ҳукм қилди. Бу ҳақда Reuters хабар берди.

Ҳодиса 2024 йил сентябрь ойида Уэст Палм Бич шаҳрида (Флорида штати) содир бўлган. Тергов маълумотларига кўра, Раут ўша пайтда Трамп бўлган гольф майдони яқинида милтиқ билан яширинган. Гумонланувчини АҚШ Махфий хизмати ходими пайқаб қолган, шундан сўнг у қўлга олинган. Ҳодиса оқибатида Доналд Трамп жабрланмади.

Суд Раутни бир нечта жиноий моддалар, жумладан, АҚШ президентлигига номзодни ўлдиришга уриниш, ўқотар қуролга ноқонуний эгалик қилиш ва федерал агентга қаршилик кўрсатиш бўйича айбдор деб топди. Унга муддатидан олдин озод қилиш ҳуқуқисиз умрбод қамоқ жазосига қўшимча равишда қурол эпизоди бўйича етти йиллик жазо тайинланди.

Прокуратуранинг таъкидлашича, судланувчи ҳужумга пухта тайёргарлик кўрган, ўз ҳаракатларини яшириш учун бир нечта мобил телефонлар ва сохта исмлардан фойдаланган. Раутнинг ўзи суд жараёнида қотиллик содир этиш ниятида бўлмаганини таъкидлади, бироқ суд бу далилларни асоссиз деб топди.

Ҳукмни федерал судья Айлин Кэннон чиқарди, у судланувчининг ижтимоий хавфлилик даражаси юқорилиги ва унда пушаймонлик аломатлари йўқлигини таъкидлади. Ҳукм эълон қилингандан сўнг, Раут суд залида ўзига зарар етказмоқчи бўлди, аммо федерал маршалл хизмати ходимлари томонидан тўхтатилди.