Украина Россия зарбаларидан сўнг музокаралардаги позициясини қайта кўриб чиқади

Украина президенти Володимир Зеленскийнинг сўзларига кўра, РФ АҚШ президенти Доналд Трампнинг илтимосини бажармади ва “энергетик сулҳ”ни тўхтатди. “Россияликлар яна Америка томонининг саъй-ҳаракатларини инобатга олмади. Қўшма Штатлар президентининг энергетика ва муҳим инфратузилмага зарба бермаслик ҳақида илтимоси бўлган”, — деди у сешанба, 3 феврал куни Киевда НАТО бош котиби Марк Рютте билан ўтказилган қўшма матбуот анжуманида.

Зеленский эслатишича, Трамп Россия раҳбариятидан Украина энергетик инфратузилмасига бир ҳафта давомида зарба бермасликни сўраган. “Энергетик сулҳ” 29 январ тундан бошланган, “бугунги тунга ўтар пайтда эса россияликлар ваъдани бузди”, — деди у.

Украина президенти фикрича, россияликлар урушни давом эттириш ниятида ва “бу қишнинг энг совуқ кунларини кутди — Украинанинг катта ҳудудида ҳарорат -20°C дан ҳам паст бўлган пайтни”. У 3 февралга ўтар кечаси РФ ҚК Украинага 71 та ракета ва 450 та дрон билан зарба берганини айтиб ўтди: бу кенг кўламли ҳужум қаттиқ совуқлар авжига тўғри келган.

Зеленский таъкидлашича, РФ Трамп таклиф қилган қисқа муддатли танаффусдан дипломатияни қўллаб-қувватлаш учун эмас, балки ракеталарни “тўплаш” ва йилнинг энг совуқ кунларини кутиб, катта ҳужум қилиш учун фойдаланган. Шу сабабли у Украина делегациясининг 4–5 феврал кунлари бўлиб ўтадиган уч томонлама музокаралардаги иши қайта мослаштирилиши ҳақида огоҳлантирди.

“Россиянинг ҳар бир бундай зарбаси Москвадаги муносабат ўзгармаганини тасдиқлайди: улар ҳамон уруш ва Украинани йўқ қилишга таянади, дипломатияни эса жиддий қабул қилмайди”, — деди Зеленский. У Украина ҳамкорлари “бўлаётган воқеаларга нисбатан сукут сақламаслиги”га умид билдирди. Унинг айтишича, Киевга янада кўпроқ қурол-яроғ, жумладан Patriot ҳаво мудофааси тизимлари учун ракеталар керак.

Бундан ташқари, Зеленский Рюттенинг айни қийин пайтда Киевга келганидан хурсанд эканини айтиб, ёрдами учун миннатдорлик билдирди. Ўз навбатида, НАТО раҳбари ғарбдаги ҳамкорлар Украина учун хавфсизлик кафолатларининг уч даражасини кўриб чиқаётганини тасдиқлади. Унинг сўзларига кўра, биринчи даража — ҳамкорлар ёрдамида Украина армиясини кучайтириш, у РФ яна ҳужум қилган тақдирда мудофаага тайёр бўлиши керак.

Иккинчи даража — етакчилари Франция ва Буюк Британия бўлган “кўнгиллилар коалицияси”. Рюттенинг айтишича, унинг мақсади Украина ҚКни зарур нарсалар билан таъминлаш, шунингдек РФ ҳужум қилса, кейинги қадамлар бўйича кафолат беришдан иборат. Бироқ у айнан қандай ҳаракатлар назарда тутилганига аниқлик киритмади. “Учинчи даража — ёзда қўшилишни исташини айтган Қўшма Штатлар”, — дея қўшимча қилди НАТО раҳбари.

Марк Рютте 3 феврал тонгида Киевга келган. Зеленский билан музокаралардан ташқари, у Олий радада чиқиш қилди ва Мустақиллик майдонидаги Халқ миллий хотира мемориали олдида ҳалок бўлган украин жангчилари хотирасини ёд этди.