Алексеевга суиқасд ижрочилари қўлга олиниши. Ҳозиргача нималар маълум?

8 феврал куни тонгда Россия Федерал хавфсизлик хизмати Дубайда Россия фуқароси, 65 ёшли Любомир Корба РФ қуролли кучлари Бош штаби Бош бошқармси (собиқ ГРУ) бошлиғининг биринчи ўринбосари, генерал-лейтенант Владимир Алексеевга уюштирилган суиқасд бўйича гумонланувчи сифатида қўлга олингани ҳамда РФга топширилганини маълум қилди. Корба аллақачон Москвага етказилган ва ҳибсга олинган. ФХХ уни «жиноятнинг тўғридан тўғри ижрочиси» деб атаган. 

Иш доирасида яна икки гумонланувчи бор – РФ фуқароси, 66 ёшли Виктор Васин ҳамда РФ фуқароси, 54 ёшли Зинаида Серебрицкая. Махсус хизматларга кўра, Васин Москвада қўлга олинган, Серебрицкая «Украинага жўнаб кетиш»га улгурган. 

РФ мудофаа вазирлиги генерал-лейтенанти Владимир Алексеевга суиқасд 6 феврал куни тонгда амалга оширилганди. Генералга Москванинг Волоколамское шосседаги уйи подъезди олдида бир неча бор ўқ узилган. Алексеев оғир аҳволда шифохонага ётқизилган. 7 феврал куни генерал операциядан кейин ўзига келгани хабар қилинди. 

Россия ташқи ишлар вазири Сергей Лавров Алексеевга уюштирилган суиқасд «Зеленский режимининг музокаралар жараёнини бузишга қаратилган доимий провокацияларга интилишини тасдиқлаши» ҳақида гапирди. Украина ташқи ишлар вазири Андрей Сибига Киевнинг суиқасдга алоқадорлиги ҳақидаги айбловларни рад этди.

ФХХ кузатув камераларидан олинган кадрларни ҳам эълон қилган, уларда суиқасд ижрочиси қуролни қор уюми ичига ташлаб кетганини кўриш мумкинлиги айтилган.

Кейинроқ Тергов қўмитаси ҳам баёнот билан чиқди. Унда Корба – Тернопил областидан (Украина) экани айтилади. Терговчилар версиясига кўра, у Москвага 2025 йил декабр ойи охирида Украина махсус хизматларининг теракт амалга ошириш бўйича топшириғи билан келган. Терговчилар воқеа жойидан Макаров тўппончасини топишган, унда овоз пасайтиргич ҳамда учта патрон бўлган.

«Агентство» интернетда сиздирилган маълумотларга таяниб, Корба 2021 йилда Ханти-Мансийск автоном округининг Нягани шаҳрида рўйхатдан ўтгани (у бу ерга Тернопол областидан қачон келгани аниқ эмас) ҳақида хабар берган. У бу ерда механизатор бўлиб ишлаган. Кейинроқ у Москва областининг Раменск шаҳрида ҳамда Москва шаҳридаги Бойцовая кўчасида яшаган. Кучишлатар тузилмаларга яқин ҳисобланган «База» телеграм-каналига кўра, Корбада Украина фуқаролиги ҳам бўлган; ТАСС манбаси ҳам бу маълумотни тасдиқлайди. У  2001 йилда Россия паспортини олган.

«База», «Агентство», ТАСС ва «112» телеграм-канали ёзишича, Корба ва Васин кўп йиллардан буён таниш бўлишган. Хусусан, 2016 йилда Корба Васинга икки марта пул ўтказиб берган (жами 4,5 минг рубл). «База» маълумотига кўра, Васин ва Корба 2015 йилда офицерлик курсларида танишишган («112» маълумотига кўра, улар бир-бирини 20 йилдан буён билишади). 

Васин Олтой ўлкасининг Бийск шаҳрида туғилган, турли йилларда «Жилишчник» давлат бюджет муассасасида, Новвойлик саноати илмий-тадқиқот институтида ҳамда Республика фанлар академияси Молекуляр биология институтида ишлаган. «База» Васинни собиқ офицер ҳамда Москвадаги қайсидир компаниянинг хавфсизлик бўлими собиқ бошлиғи деб атаган. «112» ёзишича, у Будённий номидаги Ҳарбий алоқа академияси филиалини тамомлаган, шунингдек, СССР қуролли кучлари Марказий офицерлар клубида «сунъий йўлдош алоқаси бўйича малакасини оширган». «База» иддаосига кўра, Васиннинг қарзлари бўлган, шунинг учун Корбага ёрдам беришга розилик билдирган. Канал маълумотига кўра, Корбага овоз пасайтиргичли Макаров тўппончасини айнан у етказиб берган. Бу маълумотни тасдиқловчи далил йўқ. «Новая газета Европа» ва «Агентство» Васиннинг номини Коррупцияга қарши курашиш фонди тарафдорларининг интернетга сиздирилган рўйхатида учратган.

Суиқасд ишидаги учинчи фигурант Зинаида Серебрицкая генерал Алексеев билан битта уйда яшаган, деб ёзмоқда кучишлатар тузилмаларга яқин бўлган Shot телеграм-канали. «Новая газета Европа» ушбу аёл Волоколамское шоссе, 24-манзилидаги уйда яшовчиларнинг гуруҳларида ёзиб келганини аниқлаган. У гуруҳда рецептлар билан бўлишган, кириш эшиги домофони кодини сўраган ҳамда батареялар яхши иситмаётганидан нолиган. Shot маълумотига кўра, аввал Зинаиданинг фамилияси Антонюк бўлган, аммо РФ фуқаролигини олганида (бу қачон бўлгани аниқ эмас), фамилиясини ўзгартирган. У Алексеев яшайдиган бу уйга 2025 йил декабрида кўчиб келган. Интернетга сиздирилган маълумотларга кўра, Антонюк Украинанинг Луҳанск области Славяносербский райони Хорошее қишлоғида туғилган. «База» маълумотига кўра, ушбу аёл генералнинг кун тартиби бўйича маълумот йиғиш билан шуғулланган.

«У уйда қачон бўлиши, иш жадвали ҳақида маълумот тўплаган. Шунингдек, аёл генералнинг қўшнилари билан мулоқот қилиб, унинг ҳаёти ҳақида маълумот тўплаган. У чат ёрдамида подездлардаги домофон кодини ва кузатув камералари қаерда жойлашганини билиб олган», – дейди ТАССнинг ҳуқуқ-тартибот идораларидаги манбаси.