АҚШ Адлия вазирлиги Оқ уй яқинидаги отишмани Трампга қарши янги суиқасд деб атади

Адлия вазирлиги баёнотида айтилишича, жиноятчи «яна бир бор президент, унинг оиласи ва ходимларини ўлдиришга уринган».

Фото: AP /Alex Brandon

АҚШ Адлия вазирлиги ўтган дам олиш кунлари Оқ уй яқинидаги отишмани президент Доналд Трампга қилинган навбатдаги суиқасд деб тан олди. Шу сабабли президент маъмурияти Оқ уйда қурилаётган янги зиёфат залида кучайтирилган хавфсизлик чораларига нисбатан қўйилган чекловларни бекор қилишни сўраб, яна бир бор федерал судьяга мурожаат қилди, деб хабар берди ABC News.

Шанба куни кечқурун номаълум шахс Оқ уй ёнидаги назорат-ўтказиш пунктига бориб, ўқ узган. Махфий хизмат ходимлари жавоб ўқларини отди, у яраланди, кейинчалик шифохонада вафот этди. Маълум бўлишича, ўқ отган одамнинг исми Носир Бест ва у 21 ёшда.

Адлия вазирлиги баёнотида айтилишича, жиноятчи «яна бир бор президент, унинг оиласи ва ходимларини ўлдиришга уринган». У Махфий хизмат назорат-ўтказиш пунктига яқинлашиб, сумкасидан катта калибрли қуролни олиб, Оқ уйга қарата ўқ узган.

Баёнотда айтилишича, Оқ уйда янги зиёфат зали қурилишини тақиқлаш «мамлакат учун шармандаликдир». Бундан ташқари, ҳужжатда айтилишича, янги зал жиноятчилардан «хавфсиз панагоҳ»га айланади.

2025 йилда Трамп Оқ уйнинг Шарқий қанотида 400 миллион долларлик янги зиёфат зали қуриш учун реконструкция ишларини бошлади. Май ойида АҚШ Сенати Оқ уйнинг «шарқий қанотини модернизация қилиш» лойиҳаси доирасида президент учун янги хавфсизлик чораларига 1 миллиард доллар ажратишни назарда тутувчи қонун лойиҳасини маъқулламади.

Адлия вазирлиги баёнотида айтилишича, залда «дронлардан ҳимояловчи мустаҳкам том, ракета ва учувчисиз учиш аппаратларига чидамли устунлар, ўқ ўтказмайдиган ва портлашга чидамли ойналар, шунингдек, ҳарбий тоифадаги вентиляция тизимларидан» ташқари, томда «Оқ уй ва бутун Вашингтонни ҳимоя қиладиган дронлар станцияси ва снайперлар учун жой» бўлади.

Оқ уй яқинидаги отишмадан сўнг, АҚШ президенти Доналд Трамп «ажойиб Махфий хизмат» ва ҳуқуқ-тартибот идораларига тезкорлиги ва профессионаллиги учун миннатдорчилик билдирди ва барча бўлажак президентлар учун Вашингтонда «энг хавфсиз ва ишончли» жой яратиш муҳимлигини эслатди.