АҚШ Венесуэлага Россия билан ҳар қандай нефт битимларини расман тақиқлади

АҚШ Молия вазирлиги Венесуэла нефти билан ишлаш шартларини қатъийлаштирди, Россия ва бошқа бир қатор давлатлар билан ҳар қандай келишувларни расман тақиқлади. Хорижий активларни назорат қилиш бошқармаси (OFAC) томонидан берилган янги лицензияларга кўра, Венесуэланинг PDVSA давлат нефт ва газ компанияси билан операцияларга рухсат бериш энди санкция остидаги мамлакатлар билан ҳамкорликнинг йўқлиги билан бевосита боғлиқ.

Америка идораси томонидан чиқарилган учта лицензия Венесуэла ҳукумати, PDVSA ва унга алоқадор тузилмалар билан ўзаро алоқада бўлиш учун алоҳида чекловларни қисман олиб ташлайди. 46А-сонли лицензия АҚШ ваколатли ташкилотлари томонидан Венесуэла нефтини экспорт қилиш, қайта экспорт қилиш, ташиш ва қайта ишлашга, 48-сонли лицензия эса Венесуэлада қидирув ва қазиб олиш учун товарлар, технологиялар ва хизматларни етказишга рухсат беради. Учинчи лицензия мамлакат портлари ва аэропортлари фаолияти учун зарур бўлган операцияларга тааллуқлидир.

Барча рухсатномаларнинг асосий шарти Россия, Куба, Эрон ва Шимолий Кореяни, шунингдек, улар назорати остидаги тузилмаларни битимларга жалб қилишни бевосита тақиқлашдир.

Бу чекловлар Россиянинг Венесуэлага киритган сармоясига таъсир қилади, Reuters ҳисоб-китобларига кўра, бу 17 миллиард долларга яқин ва нефт конларидаги улушларни ўз ичига олади. «Роснефт» 2010 йилларнинг ўрталарида PDVSA билан бешта қўшма корхона очган. 2020 йилда Венесуэла компанияси санкциялар остида қолганида, «Роснефт» Венесуэла активларидан чиқишини эълон қилди, бироқ улар янги ташкил этилган тузилмага - Россия ҳукуматига 100 фоиз тегишли бўлган «Росзарубежнефт»га ўтказилди.

Шу йил январ ойида Николас Мадуро ҳибсга олинганидан сўнг, АҚШ президенти Доналд Трамп Венесуэла нефти бундан буён «АҚШ мулки» эканини айтди ва хорижий компаниялардан Каракас билан бевосита эмас, балки АҚШ маъмурияти орқали ишлашни талаб қилди.

Reuters ҳисоб-китобларига кўра, 2006 йилдан 2017 йилгача Кремл Венесуэла ҳукуматига, шунингдек, мамлакатнинг давлат нефть компанияси PDVSA учун 17 миллиард доллар ажратган.