НАТО «Арктика қўриқчиси» миссияси бошланганини эълон қилди

НАТО Арктикада блок қўшинларининг мавжудлигини кенгайтиришга қаратилган Arctic Sentry («Арктика қўриқчиси») миссиясини бошлаганини эълон қилди, деб хабар берди Reuters.

Миссия минтақадаги иттифоқчиларнинг ҳарбий иштирокини, шу жумладан Гренландиядаги «Арктика чидамлилиги» машғулотлари доирасида мувофиқлаштиришни таъминлашга қаратилган.

«Арктика қўриқчиси» операцияси альянснинг ўз аъзолари хавфсизлигини таъминлаш ва дунёнинг стратегик жиҳатдан энг муҳим ва экологик жиҳатдан мураккаб минтақаларидан бирида барқарорликни сақлашга содиқлигини таъкидлайди», деди АҚШ ҳарбий-ҳаво кучлари генерали, Европадаги НАТО кучлари бош қўмондони Алексус Гринкевич.

Унинг қайд этишича, бу НАТОга ўз ҳудудларини ҳимоя қилиш, Арктика ва Узоқ Шимол хавфсизлигини таъминлаш учун ўз кучидан фойдаланиш имконини беради.

Bloomberg маълумотларига кўра, Арктика минтақасида хавфсизлик манфаатларини кузатиш ва ҳимоя қилиш учун «Арктика қўриқчиси» миссиясини ташкил этишни Германия таклиф қилган. Арктика йўналишига эътибор АҚШ вакилларининг Гренландияни сотиб олиш мумкинлиги ҳақидаги баёнотлари фонида кучайди, Европа давлатлари ўз контингентларини оролга йўналтира бошлади.

Reuters хабарига кўра, НАТО Арктикадаги миссиясини АҚШ президенти Доналд Трамп ва альянс бош котиби Марк Рютте ўртасида Давосда бўлиб ўтган музокаралардан кейин режалаштирган. Дания таркибидаги Гренландия автоном ҳудудининг келажагини муҳокама қилиш Трампнинг АҚШ учун стратегик аҳамиятга эга бўлган оролга даъволаридан кейин юзага келган кескинликни камайтиришга имкон берди.

НАТО вакилининг Reuters нашрига айтишича, «миссия Россиянинг фаоллиги ва Хитойнинг Арктикага қизиқиши ортиб бораётгани муносабати билан тийиб туриш ва мудофаани кучайтириш бўйича саъй-ҳаракатларнинг бир қисми бўлади».