Давлатлараро воситачи: Эпштейн ишидаги сиёсий деталлар

Бутун дунё ҳамон америкалик педофил Эпштейннинг файлларини муҳокама қилмоқда. Америка Адлия вазирлиги шунақа кўп маълумот эълон қилдики, худди кимнингдир номини чалкаш, уйдирма ва устига қора тортилган ҳақиқатдан иборат 6 миллион саҳифа ичига кўммоқчи бўлишгандай.

Бугун педофил ишидаги фаҳш мавзусига эмас, ундаги сиёсий эпизодларга эътибор қаратамиз. Файлларда жуда катта номлар, жуда жиддий ташкилотлар ҳақида сўз боради. Эпштейн жосус бўлгани, қайсидир давлат учун компромат тўплагани ҳақида версиялар ҳам кўпайди. Бунга ҳам тўхталамиз.

Собиқ ва бўлажак президентлар

Ўртамиёна молиячи бўлган Эпштейн бу соҳада ҳам ниманидир қойиллатгани аниқ эмас. Шундай бўлса-да, Американинг энг олди одамлари билан таниш бўлган. Етмаганига бошқа давлат раҳбарлари, миллиардерлар, разведка ташкилотлари билан алоқа ўрнатган. Файлларда номи тилга олинган одамлар кўплигидан уларни алифбо тартибида жойлаб чиқишяпти. Келинг, биз ҳам баъзи номларга эътибор қаратамиз.

Анил Амбани — Ҳиндистоннинг энг бой одамларидан бири. Дунё иқтисодий инқироздан энди чиққан 2010 йилларда бу одамнинг 14 миллиард долларга яқин пули бўлган. Анил Амбани ҳиндистонлик бошқа бир машҳур миллиардер Мукеш Амбанининг укаси. Файлларга кўра, Эпштейн миллиардер Амбани билан 2015 ва 2017 йилларда ёзишган. Уларни БААлик миллиардер, дунёдаги энг йирик порт операторларидан бирига эгалик қилувчи Султон Аҳмад ибн Сулайем таништирган. Бу машҳур араб миллиардер Эпштейн билан қалин бўлган, унинг уйида арабча овқат тайёрлаётгани тасвирланган расм ҳам бор.

Амбани Эпштейндан Ҳиндистон ва АҚШ ўртасидаги ҳарбий ҳамкорликни яхшилаш учун Оқ уй билан муносабат ўрнатишда ёрдам сўраган. Ўша вақт АҚШ президенти ким бўлгани эсингиздадир — Доналд Трамп. Амбани молиячидан Ҳиндистон раҳбарияти вакиллари учун Трампнинг куёви Жаред Кушнер ҳамда президент маслаҳатчиси Стив Бэннон билан учрашув ташкил қилиб беришни ҳам сўраган. Улар иккиси 2019 йил молиячининг Манҳэттендаги уйида учрашган. Ўша куни Эпштейн Трампнинг асосий маслаҳатчиси Бэннонга «Моди бўйича яхши суҳбат ўтказгани» ҳақида ёзган.

Ишнинг қанчалик жиддий эканини тушуниш учун мана шу эпизоднинг ўзи етарли. Бутун бошли давлатлар Эпштейндан АҚШ раҳбарияти вакиллари билан учрашув ташкил қилиш, ҳатто ҳарбий ҳамкорлик бўйича ёрдам сўраган. Бу педофил ким эдики бунақа катта масалаларни ҳал қилган бўлса?

Барак Эҳуд — Исроил собиқ бош вазири, 6 йил мудофаа вазири ҳам бўлган. Ёзишмалардан бирида Эпштейн Исроил собиқ етакчисига «Сен менинг Моссадга ишламаслигим ҳақида аниқ айтишинг керак», деб ёзган. Гап охирига смайлик ҳам қўйган. Эпштейн билан яна бир ёзишмада Исроил собиқ бош вазири Эҳуд дўсти Ларри Саммерс АҚШ Федерал захира тизими раҳбари лавозимига номзоди қўйилишидан бош тортгани, «бу дўсти учун жиддий зарба бўлганини» айтган.

Саммерс ҳам катта одам, беш йил Ҳарвард университети президенти, икки йил Америка молия вазири, жаҳон банкида бош иқтисодчи бўлган. Ва ана шу машҳур иқтисодчини негадир Исроил собиқ бош вазири ва америкалик педофил ўзаро ёзишмада муҳокама қилган.

Билл Клинтон — АҚШнинг 42-президенти, у файллардаги энг шов-шувли одамлардан бири. Адлия вазирлиги эълон қилган файлларда демократнинг жуда кўп суратини кўриш мумкин. Клинтон педофилнинг оролига 28 марта боргани айтилади. Суратлардан бирида собиқ президент ваннада номаълум қизлар билан бирга чўмилаётганини кўриш мумкин.

Уилям Бёрнс — Марказий разведка бошқармаси собиқ директори. Жо Байден президентлик вақтида МРБни бошқарган Бёрнс 2014 йил Эпштейн билан уч марта режалаштирилган учрашув ўтказган. Учрашувлардан бири Вашингтонда, бири Эпштейннинг Манҳэттендаги уйида ўтказилган. У вақтлар Бёрнс Обама маъмуриятида давлат котибининг ўринбосари бўлиб ишлаган.

Сергей Брин – Google асосчиларидан бири. Файлларга кўра, Эпштейн оролига борган ва педофилнинг вакили Максвелл билан Эпштейннинг уйидаги кечки овқат масаласида ёзишган.

Стив Бэннон – Оқ уй собиқ мулозими. Доналд Трамп президентлик фаолиятини бошлаганда Оқ уйнинг энг асосий стратеги, президент маслаҳатчиси бўлган. 2016 йилги Трамп президентлик кампаниясини бошқарган. Ўша вақтда республикачилар партиясидаги энг таъсир доираси катта одамлардан бири.

Файлларда Бэнноннинг педофил билан минглаб ёзишмалари келтирилган. Улар глобал масалаларни, хусусан, Хитойга босим ўтказиш, Яқин Шарқ ва Европа коалициясини муҳокама қилган. Эпштейн амалда Трамп президент бўлишида катта рол ўйнаган Бэннонга ўзининг Палм-Бичдаги ва Париждаги уйидан, шунингдек, шахсий самолётидан фойдаланишни таклиф қилган, улар кўп марта бирга овқатланган. Ёзишмаларда бугун ҳам актуал бўлиб турган Трамп ва Федерал захира тизизми раҳбари Пауэл ўртасидаги муносабатларни ҳам муҳокама қилишган.

Майл Жексон – қўшиқчи. Файлларда машҳур қўшиқчининг Эпштейн билан тушган иккита суратини кўриш мумкин. Битта суратда Жексон ва Эпштейн ёлонғоч аёл тасвирланган картина фонида расмга тушган. Яна бир расмда Жексондан ташқари Билл Клинтон ва актрисса Дайана Райс ҳам бўлган. Лекин суратларнинг ҳеч қандай изоҳи йўқ, санаси ҳам маълум эмас. Жексон оролга боргани ҳақида ҳам маълумот йўқ.

Илон Маск файлларидан энг юзи ёруғ бўлиб чиққан одам, менимча. Ёзишмаларга кўра, молиячи Маск билан бир неча марта учрашув ўтказишни сўраган, лекин у вақти йўқлигини айтган. Бир ёзишмада Маск «ишдан чалғиб кўнгил ёзишни исташи ҳақида» гапирган, лекин катта эҳтимол улар барибир учрашмаган. Маск файллардан номи чиққач тезда жавоб бериб, педофил билан ёзишганларни титкиламай, у билам бирга оғир жиноят қилганларни жазолаш кераклигини айтди.

Стивен Ҳокинг – америкалик физик олим. Ҳокинг оролга боргани айтилади. Унинг исми педофилнинг вакили бўлиш Гислейн Максвелл устидан суд ишида тилга олинади. Электрон хатлардан бирига кўра, Эпштейн Ҳокинг устидан айбловларни рад эта оладиганлар учун муҳофот таклиф қилган. Ўша айбловда Ҳокинг Эпштейн оролидаги бузуқликларда иштирок этгани айтилади. Лекин машҳур физик олимнинг жисмоний ҳолати, хусусан, доим ногиронлик аравачасида юргани ҳисобга олинса, бу айбловда шубҳа пайдо бўлади.

Ягланд Турбёрн – Норвегия собиқ бош вазири. Сиёсатчи Эпштейнга оиласи билан унинг оролига дам олиш учун бормоқчи экани ҳақида ёзган. Ташриф Қрим аннексияси сабаб бекор бўлган, чунки Ягланд ўша пайт Европа кенгаши бош котиби бўлган. Педофил билан ёзишган вақти Нобел қўмитасини ҳам бошқарган.

Ва файлларда номи тилган олинган энг машур одам АҚШнинг ҳозирги президенти Доналд Жон Трамп. Аслида ана шу Трамп сайлов кампанияси вақтида Эпштейн файллари эълон қилинишига ваъда берганди. Ва файлларда энг кўп номи тилган олинган одамлардан бири ҳам унинг ўзи бўлиб чиқди. Трампнинг молиячи билан тушган жуда кўп сурати, видеолари бор.

Трамп билганди, Трамп сезганди…

Америкаликлар эълон қилинган ҳужжатлардан кейин барибир ким Эпштейн оролида ёш болалар билан жинсий алоқа қилгани ҳақида машъум саволга жавоб топа олмади. Бу фитна назариялари купайишига олиб келди. Кенг тарқалган версиялардан бирига кўра, Америка Адлия вазирлиги миллионлаб мужмал ҳужжатларни эълон қилиш орқали Доналд Трамп исмини бу мужмал, бир қисми махфийлаштирилган ҳужжатлар орасида йўқолиб кетишини истаган. Яна такрорлайман, бу одамлар орасида тарқалган версиялардан бири.

Файллар миллионлаб америкаликлар муҳокама марказида бўлган, қачондир ундан Трампнинг исми барибир чиқарди. Президент ҳам буни яхши билган. Шу боис файллардаги ҳамма исмларни бирдан эълон қилиш орқали ахборий хаос юзага келтиришга уринишгандир балки.

Шу кунларда файллардаги бир эпизод кенг муҳокама қилинмоқда. Палм-Бич шаҳри собиқ полиция раҳбари ФҚБ агентлари билан суҳбатда 2006 йил Трамп унга қўнғироқ қилиб, «Жеффри Эпштейннинг жиноятлари ҳақида ҳамма билишини айтгани» ҳақида гапириб берган. Трамп офицерга «Худога шукур, сиз уни тўхтатдингиз, у нима билан шуғулланганини ҳамма биларди», деган.

Трамп полиция раҳбарига Эпштейнни Мар-а-Лагодаги клубидан ҳайдаб чиқаргани, Ню-Йоркда унинг қанчалик ёқимсиз одам эканини билишларини айтган. Шунингдек, педофилнинг ёнидаги аёл Максвеллга эътибор бериш кераклигини маслаҳат берган. Оқ уй ҳам айнан мана шу эпизодга эътибор қаратишни сўраётганига қараганда, бу ҳужжат бежизга устига қора тортмай эълон қилинмаганга ўхшайди.

Жосусми ё қўшмачи?

Энди бу ишдаги баъзи шубҳали деталларга эътибор берсак. Энг шубҳали нарсаки шуки, Эпштейн ҳеч ким билан суҳбатларини яширишга уринмаган ва файллардаги одамлар билан почта орқали ёзишган. Одатда бунақа катта одамлар почта орқали ёзишиб ўтирмайди, гапи бўлса, телефон қилади, учрашади. Лекин товариш педофил модел бўлишни орзу қиладиган, ҳомийга муҳтож қизлар билан ҳам, бутун бошли икки давлат муносабатларини ўрнатиш бўйича ёрдам сўраганлар билан ҳам эринмай почта орқали гаплашган. Худди ёзишмаларни сақлаб қўйиш учун қилгандай.

Яна бир шубҳали нарса, Эпштейн унинг оролига маишат қилиш учун борганларни ҳадеб расмга олган. Ҳатто ярим ёлонғоч эркаклар ёш қизлар даврасида турган кадрлар бор, эълон қилинмаган файллар ичида жинсий алоқа, зўрлаш кадрлари борлиги ҳам тахмин қилинади.

Мантиқан олиб қараганда, яхши иш қилмаётганини билган одамлар бу иши расмга олинишини истамайди, лекин педофил барча жараённи эринмай расмга олган. Кейин у қайси машҳурни кўрса, у билан албатта расмга тушган. Бунинг номини компромат тўплаш дейишади, мен бошқача таъриф тополмадим.

Бу педофил катта-катта одамларни ўз оролига таклиф қилиб турли базмлар ташкил қилган, бутун дунёдан модел бўлиш орзусидаги қизларни тўплаб жинсий алоқа қилган, уларни бой одамларга қўшган, баъзи қурбонларнинг айтишича, ёш қизлар ҳатто кимошди савдоларида сотилган.

Худди шу педофилдан одамлар бутун бошли давлатлар ўртасида алоқа ўрнатиш борасида ёрдам сўраган, бутун бошли давлат раҳбарлари Америка марказий банки раҳбари масаласини у билан муҳокама қилган, президентларнинг куёвлари билан учрашув ташкил қилишни сўрашган.

Ва яна шу педофил барча расвогарчиликларни расмга, видеога олиб гўёки Америка сиёсий элитаси устидан компромат тўплаган. Энди савол пайдо бўлади: Жеффри Эпштейн ким ўзи? Сиёсий масалаларни ҳал қиладиган ўртакашми, Америка элитаси устидан қайсидир давлар учун компромат тўплаган жосусми ёки аёлларни сотувчи қўшмачими?

Мени ҳайрон қолдиргани, Жеффри Эпштейн вояга етмаган қизларни пул берибми, модел қиламан дебми, хуллас, нима қилиб бўлса ҳам авраган, улар билан жинсий алоқа қилган. Қизларни қўлини қайириб оролига олиб бормаган бўлса ҳам, кейинчалик қурбонларнинг айтишича, уларни сотиш билан шуғулланган, унинг оролида кап катта эркаклар ёш болалар билан кўнгилҳушлик қилган. Лекин Эпштейн оролида шу ишларни қилган ҳеч ким жазоланмаган.

Педофил бу ишлар билан бир-икки марта эмас, 20 йилдан ортиқ вақт давомида шуғулланиб келган. Ҳатто расман қамоққа ҳукм қилинган вақтида ҳам оролида кайф-у сафо қилиб юрган. Лекин иш бўйича фақат Эпштейн ва унинг амалда иш бошқарувчиси Максвелл қамалган. Мижозлар, оролга ёш қизлар учун борганларнинг бирортаси жавобгарликка тортилмаган, уларнинг рўйхати ҳам йўқ.

Бунақа шубҳали фактлардан кейин Эпштейн чиндан ўлганми ўзи деган савол ҳам ўртага чиқмоқда. Чунки педофил ўлган тунда қамоқхонадаги камералардан бирида бошқа бир одам унинг камерасига яқинлашгани кўрингани, ҳаммасини ойдинлаштириши керак бўлган камералардан бири ишламай қолгани, Эпштейннинг укаси Марк акаси ўлдирилгани ҳақида гапиргани бу борада шубҳаларни янада кучайтиради.

Хуллас, кимдир бутун дунё билан, айниқса Америка элитаси билан жуда катта ўйин ўйнаётганга ўхшайди. Шундай бўлса, ўша ғаламис мақсадига эришди – замонавий дунё ҳали бунақа ахборий хаос билан тўқнаш келмаганди...