FT: Рубио Украина бўйича европаликлар билан учрашувни бекор қилди

АҚШ давлат котиби Марко Рубио Россиянинг Украинага қарши уруши масаласи бўйича европалик етакчилар билан бўлиши керак бўлган учрашувни сўнгги дақиқада бекор қилди, деб хабар қилди Financial Times газетаси жума куни, 13 февралда манбаларга таяниб. Газета маълумотига кўра, Рубио Мюнхенда ўтаётган халқаро Хавфсизлик конференцияси доирасида Германия, Франция, Полша ва Еврокомиссия раҳбарияти вакиллари иштирок этадиган музокараларда қатнашиши керак эди.

Номи ошкор этилмаган америкалик амалдор Рубионинг учрашувга келмаслигини “Мюнхенда айнан шу вақтга режалаштирилган учрашувлар сони кўплиги” билан изоҳлаган. Нашр суҳбатдошларидан бири бўлган европалик амалдор эса учрашувнинг бекор қилинишига “телбалик” деб баҳо берган. FT ёзишича, европаликлар фикрига кўра, Рубионинг бу қарори Вашингтоннинг ЕИнинг Россия–Украина урушига чек қўйиш бўйича саъй-ҳаракатларига қизиқиши “сусайгани”дан далолат бериши мумкин.

Нашрнинг европалик суҳбатдошларидан бири учрашувдан кейин шундай деган: АҚШ Давлат департаменти раҳбарининг иштироки бўлмагач, европаликларнинг музокаралари “мазмундан маҳрум” бўлган. Шу билан бирга, Марко Рубио Германия канцлери Фридрих Мерц билан алоҳида учрашув ўтказгани ҳам хабар қилинади. Мерцнинг сўзларига кўра, муҳокаманинг марказий мавзулари Украина ва унинг Россия билан тинчлик музокараларининг ҳолати бўлган. Бундан ташқари, Financial Times ёзишича, Рубио Германиянинг НАТОни мустаҳкамлаш бўйича саъй-ҳаракатларини юқори баҳолаган.

АҚШ давлат котибининг Мюнхен хавфсизлик конференциясидаги нутқи 14 февралга режалаштирилган. Шунингдек, шу куни Марко Рубио Украина президенти Володимир Зеленский билан ҳам учрашиши кутилмоқда, бироқ Рубионинг ўзи бу учрашув бўлишига “100 фоиз ишончим комил эмас”, деб айтган.