Австрия канцлери Украина бўйича ЕИнинг Путин билан музокара олиб боришини қўллаб-қувватлади

Украинадаги урушни тўхтатишга эришиш учун Европа Иттифоқи Россия билан тўғридан тўғри музокараларни бошлаши керак. Бу фикрни Австрия федерал канцлери Кристиан Штокер Table.Briefings платформасининг подкастида билдирган, подкаст 15 феврал, якшанба куни эълон қилинган.

“Ўйлайманки, бизга Россия билан алоқа каналлари керак; музокараларсиз ечим тополмаймиз”, — деди у. Австрия ҳукумати раҳбарининг айтишича, у ҳали ҳеч қачон “бошида суҳбат бўлмаган жойда кейин ечим чиққанини кўрмаган”. Штокер аниқлаштиришича, бу Россия президенти билан музокараларга ҳам тегишли: “Охир-оқибат бу Путиннинг ўзига ҳам тааллуқли, чунки қарорни у қабул қилади”.

Аввалроқ ЕИнинг Украина бўйича Россия билан музокараларда иштирок этишини бошқа европалик етакчилар ҳам қўллаб-қувватлаган. Улар орасида Франция президенти Эммануэл Макрон, Италия бош вазири Жоржа Мелони, Чехия бош вазири Андрей Бабиш ва бошқалар бор.

Макрон 13 феврал куни Мюнхен хавфсизлик конференциясида Украина бўйича музокаралар ҳақида гапирар экан, европаликлар “мунозарада иштирок этиши” шартлигини айтган. У Россия билан “шаффоф алоқа каналини қайта тиклаш” истагини билдирган.

Бабиш 7 феврал куни “энди европалик етакчилар Европа Путин билан ҳам музокара қилиши керак, деб гапира бошлади”, деб таъкидлаган. “Ахир олдин Виктор Орбан Зеленскийни ҳам, Путинни ҳам олдига борганида, ҳаммаси буни қоралаган эди”, — деб эслатган у. Бабиш фикрича, Украина бўйича музокараларда ҳал қилувчи ролни АҚШ президенти Доналд Трамп ўйнайди ва “Трампсиз Европа эплай олмайди”.

ЕИнинг Кремл билан мулоқотни қайта жонлантириш ва Украина бўйича музокараларда европаликларнинг иштирокини таъминлаш учун махсус вакил тайинлаш ғоясини Латвия бош вазири Эвика Силиня ҳамда Эстония президенти Алар Карис ҳам қўллаб-қувватлади. Улар 4 феврал куни Euronews телеканалига берган интервюсида Россия билан дипломатик каналларни қайта тиклаш зарурлигини айтган: бу — ҳозир Украина, Россия ва АҚШ делегациялари иштирокида кетаётган музокаралар столида ўз овозига эга бўлиш учун керак.

Германия канцлери Фридрих Мерц 2025 йил ёзидаёқ Путин билан суҳбатлардан тийилишини ваъда қилган, чунки ўша пайтдаги баҳосига кўра, Украинадаги уруш масаласида “дипломатия имкониятлари тугаган” эди. 6 феврал куни канцлер яна бир бор эсга солишича, Венгрия бош вазири Виктор Орбаннинг Москвага сафарларидан биридан кейин Россия армияси Украинага оммавий ҳужум уюштирган.

“Мен бундай натижага олиб келадиган музокараларни олиб боришни истамас эдим. Лекин бу урушни тугатиш мақсадига хизмат қиладиган ҳар қандай музокарани қўллаб-қувватлашни истардим”, — деди Мерц. Унинг сўзларига кўра, Путин билан ҳар қандай мулоқот АҚШ ва Украина билан келишилган бўлиши керак.

Шу билан бирга, 12 феврал куни YouGov социологик институти Германия фуқароларининг 58 фоизи Мерц ва Путин ўртасида тўғридан тўғри музокараларни қўллаб-қувватлашини маълум қилди. Сўровда қатнашган немисларнинг 26 фоизи эса бунга қарши чиққан. Энг кўп мулоқот тарафдорлари канцлер партияси — консерватив ХДИ/ХСИ блоки тарафдорлари орасида учрайди.