Тошкентда фарзандини 7-қаватдан чиқарган аёлнинг руҳий ҳолати текширилади

Ижтимоий тармоқларда номаълум аёл ўз фарзанди ҳаётини хавфга солиб, 7-қават деразасидан ташқарига чиқаргани акс этган видео тарқалди. Ҳолат юзасидан Тошкент ИИББ изоҳ берди.

Қайд қилинишича, Тошкент шаҳрининг Янгиҳаёт тумани, Янги Чоштепа маҳалласида яшовчи, 2001 йилда туғилган Н.К. вояга етмаган фарзандини 7-қават деразасидан чиқариб, телефонига тасвирга олган ҳамда видеони ижтимоий тармоққа жойлаган.

Таъкидланишича, ҳозир Н.К. руҳий ҳолатини текшириш мақсадида, руҳий-асаб касалликлар шифохонасига юборилган.

Унинг фарзандига зарар етмагани ҳамда у яқин қариндоши қарамоғига топширилгани айтилмоқда.

Ҳолат юзасидан Янгиҳаёт тумани ИИО ФМБ томонидан терговга қадар текширув бошланган.