ОАВ Зеленский яна уч йиллик урушга тайёрланишни буюргани ҳақида ёзди. Киев рад этди

Украина президенти Володимир Зеленский ўз маслаҳатчилари билан ёпиқ йиғилишда уларга келгуси уч йилга мўлжалланган ҳарбий ҳаракатларнинг батафсил режасини ишлаб чиқишни топширган. Бу ҳақда The Wall Street Journal’нинг Европадаги сиёсий мухбири Боян Панчевский немис журналисти Паул Ронсҳаймернинг подкастида айтиб ўтди.

Панчевскийнинг сўзларига кўра, йиғилиш 13 феврал куни, Зеленскийнинг Мюнхен конференциясига сафари арафасида бўлиб ўтган. Журналистнинг таъкидлашича, йиғилиш давомида Зеленский «музокаралар барбод бўлгани ва энди яна уч йиллик уруш режасини ишлаб чиқиш кераклигини маълум қилган».

Панчевскийнинг айтишича, ушбу йиғилишдан олдин президент офисида Россия ва АҚШ билан «қандай бўлишидан қатъи назар» келишувни референдумга олиб чиқиш ва уни баҳор охири ёки ёз бошида сайлов билан бирга ўтказиш устида иш олиб борилган.

Ва бирдан Зеленский 180 даражага бурилиб, шундай деди: буларнинг барчаси беҳуда, биз узоқ урушга тайёргарлик кўришимиз керак [...]. Қандайдир сабабларга кўра у музокараларга тайёр эмасдек туюлди. Бунинг сабаби нима эканини билмайман. Бу менинг манбам. Мен унинг учта энг яқин маслаҳатчисини биламан – улар буни ўзлари билишмаган ёки билган бўлсалар ҳам, нима учун у ўз позициясини ўзгартирганини менга айтишмаган.

Журналистнинг тахмин қилишича, АҚШ президенти Доналд Трамп Зеленскийга «сўнгги таклиф» берган, бу эса Украина президенти учун «етарли бўлмаган».

Зеленскийнинг ёрдамчиси Дмитрий Литвин 20 феврал куни бу маълумотни «фейк» деб атади. Унинг сўзларига кўра, кейинги уруш режасини тайёрлаш бўйича топшириқлар бўлмаган, шунингдек, музокаралар ҳам салбий баҳоланмаган. Шу билан бирга, Зеленскийнинг ўзи ўтган ҳафта The Atlantic нашрига берган интервюсида «ёмон келишув»ни қабул қилгандан кўра, ҳарбий ҳаракатларни давом эттириш маъқуллигини айтганди.

У Донбассдан қўшинларни олиб чиқишга рози, аммо бунинг учун Россия қўшинлари ҳам олиб чиқилиши шарт бўлади. Кремл эса Украина қуролли кучларининг бир томонлама чиқиб кетишини истайди, шунингдек, Украинага хавфсизлик кафолатлари берилишига ва хорижий қўшинлар жойлаштирилишига қарши.

Россия ва Украина музокараларга салбий баҳо бермасликка келишиб олди, деб хабар берди Женевадаги сўнгги учрашув тафсилотлари билан таниш бўлган манбалар The Telegraph нашрига. Литвинов реакциясининг сабаби ҳам шунда бўлиши мумкин.

Музокараларнинг ўзи асосий ҳудудий масала бўйича ҳеч қандай олдинга силжишсиз якунланди, деди The Telegraph манбалари. Европада музокаралар жараёнига тобора кўпроқ шубҳа билан қарашмоқда ва уруш яна бир йил, ҳатто уч йил давом этишига ишонишмоқда, деб ёзди The Wall Street Journal Европа Иттифоқи расмийларига таяниб.

WSJ манбаларига кўра, Доналд Трамп бир кун ичида ҳал қилишга ваъда берган, аммо бир йил ичида ҳам ҳал қила олмаган урушни тинч йўл билан ҳал қилишга қизиқишини йўқотмоқда.

Европа мамлакатлари разведкаси вакилларининг ишончи комилки, Украина Кремлга бутун Донбассни топширишга рози бўлса ҳам, бу Владимир Путинни тўхтата олмайди, чунки уруш режимнинг асосий «қўрғони» ва бутун давлат кун тартибининг ўзагига айланган.

Путиннинг мақсади ўзгармади, деди Reuters агентлигига разведка хизматларидан бирининг вакили: Зеленскийни ҳокимиятдан четлатиш ва Украинани Россияни Ғарбдан ажратиб турувчи «нейтрал» буфер зонага айлантириш.