Халқаро рейтинг ва индекслар билан ишлаш бўйича республика кенгаши йиғилиши ўтказилди

Мажлисда Ўзбекистон учун устувор бўлган халқаро рейтингларда мамлакат ўрнини яхшилаш бўйича 2026 йилга мўлжалланган амалий чора-тадбирлар дастурлари ҳамда илмий ташкилотларнинг илмий-тадқиқот лойиҳаларини амалга ошириш бўйича йиллик режалари лойиҳалари кўриб чиқилди. Йиғилишни Олий Мажлис Сенати раиси, Халқаро рейтинг ва индекслар билан ишлаш бўйича республика кенгаши раиси Танзила Норбоева олиб борди.

Фото: Олий Мажлис Сенати

27 февраль куни Сенатда Халқаро рейтинг ва индекслар билан ишлаш бўйича республика кенгашининг навбатдаги йиғилиши бўлиб ўтди. Уни Олий Мажлис Сенати раиси, Халқаро рейтинг ва индекслар билан ишлаш бўйича республика кенгаши раиси Танзила Норбоева олиб борди.

Йиғилишда таъкидланишича, ислоҳотлар натижасида қатор халқаро рейтинг ва индексларда Ўзбекистоннинг ўрни яхшиланган. Хусусан, ўтган йилда устувор этиб белгиланган 20 та рейтингнинг 12 тасида Ўзбекистоннинг ўрни яхшиланди. Жумладан, “Moodyʼs” халқаро рейтинг агентликлари томонидан Ўзбекистоннинг суверен кредит рейтинг кутилмаси илк бор “барқарор”дан “ижобий”га оширилди. Электрон ҳукуматни ривожлантириш рейтингида Ўзбекистон 193 та давлат орасида 63-ўринни эгаллаб, 6 поғонага юқорилади.

Шунингдек, Ўзбекистон ютуқлари илк маротаба Жаҳон банкининг янги “Business Ready” рейтингида эътироф этилди. Жумладан, мамлакат 3 та индикатор бўйича изчил ислоҳотларни амалга оширган 29 та мамлакат қаторига киритилиб, “Амалиётнинг осонлиги” йўналиши бўйича 1-гуруҳда топ-10 таликдан жой олди.

Бундан ташқари, мажлис давомида Ўзбекистоннинг устувор халқаро рейтинг ва индекслардаги ўрни яхшиланиши тўғрисидаги иккинчи миллий маъруза лойиҳаси кўриб чиқилиб, қатор тавсиялар берилди. Жумладан, устувор халқаро рейтинг ва индекслар билан ишлаш самарадорлигини ошириш, пасайиш кузатилган ва ўзгаришсиз қолаётган халқаро рейтинглар ва уларнинг таркибий индикаторларидан келиб чиқиб ислоҳотларни жадаллаштириш зарурлиги қайд этилди.

Шундан сўнг 2025 йил учун Ўзбекистоннинг устувор халқаро рейтинг ва индекслардаги ўрнини яхшилашга қаратилган амалий чора-тадбирлар дастурларининг ижроси масаласи муҳокама марказида бўлди.

Мажлисда Ўзбекистон учун устувор бўлган халқаро рейтингларда мамлакат ўрнини яхшилаш бўйича 2026 йилга мўлжалланган амалий чора-тадбирлар дастурлари (“йўл харитаси”) ҳамда илмий ташкилотларнинг илмий-тадқиқот лойиҳаларини амалга ошириш бўйича йиллик режалари лойиҳалари ҳам кўриб чиқилиб, Республика кенгашининг тегишли қарори қабул қилинди.