Биз осон ғалаба қозонамиз – Трамп уруш бошланганидан кейин илк марта жонли эфирда нутқ сўзлади

АҚШ президенти Доналд Трамп 2 март куни Вашингтондаги Оқ уйда Фахрий медаллар билан тақдирлаш маросимида нутқ сўзлади.

Бу унинг 28 феврал куни АҚШ ва Исроил Эронга қарши уруш бошлаганидан кейин биринчи марта жонли эфирдаги нутқи бўлди.

Трамп асосан уруш ҳақидаги аввалги гапларини такрорлади. Meduza ундан қисқа иқтибослар келтирди.

«Биз урушни бошладик, чунки Эрон ядровий қурол ишлаб чиқишни тўхтатмоқчи эмас эди. Бу бизнинг сўнгги ва энг яхши зарба бериш имкониятимиз эди. Эрон аллақачон Европага ва бизнинг базаларимизга зарба бера оладиган ракеталарга эга эди ва тез орада гўзал Америкага етиб бора оладиган ракеталарга эга бўларди», деди Трамп.

«Бизнинг мақсадларимиз аниқ: Эроннинг ракета салоҳияти ва ҳарбий-денгиз флотини йўқ қилиш, дунёдаги терроризмнинг бош ҳомийси ҳеч қачон ядро қуролига эга бўлмаслиги ва ўз чегараларидан ташқарида террорчиларни бошқара олмаслигини таъминлаш», деди Оқ уй раҳбари.

«Биз бошиданоқ уруш тўрт-беш ҳафта давом этишини башорат қилган эдик. Биз аллақачон прогнозлардан анча илгарилаб кетдик, аммо қанча керак бўлса, шунча узоқроқ бардош бера оламиз. Бугун кимдир ҳамма нарсани тезда қилмоқчилигимни, акс ҳолда «зерикиб қолишимни» айтди. Мен зерикмайман. Бунда ҳеч қандай зерикарли нарса йўқ. Бизда дунёдаги энг кучли ва қудратли армия бор ва биз осонгина ғалаба қозонамиз», деб қўшимча қилди Трамп.