Дубайнинг икки аэропорти душанба куни кечқурун чекланган режимда иш бошлайди

Бирлашган Араб Амирликларидаги Дубай шаҳрининг иккита аэропорти 2 март куни кечқурун ўз ишини бошлайди, аммо кам сонли рейсларга хизмат кўрсатилади, деб хабар берди амирлик ҳукумати матбуот хизмати.

«2 март куни кечқурун Дубай аэропортлари фаолияти чекланган режимда тикланади. Халқаро аэропорт (DXB) ва Ал-Мактум аэропортидан (DWC) кам сонли рейслар учун рухсат берилди», дейилади хабарда.

Аниқлик киритилишича, Emirates ва flydubai авиакомпаниялари чекланган миқдордаги рейсларни амалга оширади.

«Билетларни олдиндан банд қилган йўловчиларга устунлик берилади. Ушбу рейсларга қайта банд қилганлар билан авиакомпания бевосита боғланади», дейилади хабарда.

Таъкидланишича, саёҳатчилар ўз рейси ҳолатини авиакомпаниялардан билиб олиши ва парвоз вақтини тасдиқламасдан аэропортга чиқмаслиги керак.

Дубай аэропортлари Яқин Шарқдаги вазиятнинг кескинлашуви ва Эроннинг ҳаво зарбалари сабабли ёпилган эди. Оқибатда минглаб сайёҳлар БАА ҳудудини тарк этолмасдан қолиб кетди.