Наманганда аёл жазмани билан биргаликда ёлланма қотил орқали эрини ўлдирмоқчи бўлди

Олинган тезкор маълумот асосида тадбир ўтказилиб, жабрланувчининг ўлдирилгани саҳналаштирилган. Шартли ёлланма қотил ҳолатни тасвирга олиб, буюртмачиларга кўрсатган. Эрининг ўлганига ишонган аёл ва унинг жазмани шартли ёлланма қотилга келишилган 6 минг доллардан 5,5 мингини бераётганда қўлга олинган.

Давлатобод туманида қасддан одам ўлдириш билан боғлиқ жиноятнинг олди олинди. Бу ҳақда Ички ишлар вазирлиги ахборот хизмати хабар берди.

Маълум қилинишича, 4 март куни Давлатобод туманида яшовчи аёл турмуш ўртоғини нотаниш шахс орқали 6 минг доллар эвазига ўлдиришни режалаштираётгани ҳақида тезкор маълумот олинган. У бунинг учун ўзининг жазмани билан олдиндан жиноий тил бириктирган.

ДХХ, вилоят ИИБ ҳамда вилоят прокуратураси ҳамкорлигида тезкор тадбир ўтказилган. Буюртмачилар Telegram орқали шартли қотил билан суҳбатлашган. Аёл турмуш ўртоғи Cobalt машинасида ёлғиз юришини, уни “Андижон–Наманган” йўлидаги овлоқ жойда ўлдириб, машинасини ёқиб юбориш кераклигини, бунинг эвазига 6 минг доллар беришини айтган.

Дарҳол жабрланувчининг ўлдирилгани акс этган қотиллик жинояти саҳналаштирилган.

Шартли қотил ушбу ҳолатни тасвирга олиб, буюртмачи аёл ва унинг жазманига кўрсатган. Буюртмачилар келишилган пулдан 5,5 минг долларни шартли қотилга бераётган вақтида ашёвий далиллар билан қўлга олинган.

Ҳолат юзасидан Жиноят кодексининг 25,97-моддаси 2-қисми тегишли бандлари билан жиноят иши қўзғатилиб, гумонланувчилар процессуал тартибда ушланган. Ҳозирда дастлабки тергов ҳаракатлари олиб борилмоқда.

Аввалроқ Самарқандда ёлланма қотил орқали танишини ўлдирмоқчи бўлган шахслар қўлга олинганди.