Андижонда собиқ эрини ўлдириш учун қотил ёллаган аёл ушланди

Андижон вилояти Асака туманида ёлланма қотил орқали собиқ эрини ўлдиришни режалаштирган аёл қўлга олинди.

Хабар қилинишича, олинган тезкор маълумотларга кўра, аёл ўзи билан бирга яшовчи собиқ турмуш ўртоғини уй-жой низоси билан боғлиқ адоват замирида қасддан ўлдиришни мақсад қилиб, 3 минг доллар эвазига ёлланма қотил излаётгани аниқланган.

Шундан сўнг, тезкор тадбир ўтказишга киришилиб, шартли ёлланма қотил тадбирга жалб этилган. Аёл 10 июл куни қотиллик бўйича ёлламоқчи бўлган шахс билан кўришиб, унга 5 млн сўм берган. Эрининг ўлганига ишонч ҳосил қилгандан сўнг қолган пулларни беришни ваъда қилиб, тилхат ёзиб берган.

11 июлга ўтар кечаси ўтказилган тезкор тадбирда ёлланма қотил аёлнинг турмуш ўртоғини Асака туманидаги адирликка олиб бориб, унинг ўлдирилганини билдириб, буюртмачи аёлни воқеа жойига чақирган.

Эри ўлганлигига ишонч ҳосил қилган аёл келишилган пулларни бериш учун автомашинага ўтирган вақтда ашёвий далиллар билан қўлга олинган.

Мазкур ҳолат юзасидан унга нисбатан билан жиноят иши қўзғатилган.