Трамп Эрондан сўзсиз таслим бўлишни талаб қилди

Доналд Трампнинг сўзларига кўра, шундан сўнг Эронга мақбул раҳбар танланади.

Фото: Global Look Press

АҚШ президенти Доналд Трамп Эрон билан келишув бўлмаслиги, мамлакат сўзсиз таслим бўлиши кераклигини айтди.

"Эроннинг сўзсиз таслим бўлишидан ташқари бошқа ҳеч қандай келишув бўлмайди", - деб ёзди у Truth Social тармоғида.

Трампнинг сўзларига кўра, шундан сўнг бу мамлакатга мақбул раҳбар танланади.

“Эронни иқтисодий жиҳатдан ҳар қачонгидан каттароқ, яхшироқ ва кучлироқ қилиб, уни инқироз ёқасидан қайтарамиз. Эроннинг келажаги буюк. Эронни яна буюк қиламиз”, деб таъкидлади у.

28 феврал куни АҚШ ва Исроил Эронга ҳужум бошлади. Эрон бунга жавобан АҚШнинг Яқин Шарқдаги объектларига ҳамда Исроилга зарбалар берди.

4 март куни Пентагон раҳбари Пит Хегсет АҚШ операциянинг янги босқичига ўтишини маълум қилди. Унинг сўзларига кўра, Америка кучлари Эроннинг янада ичкарисига зарба беради. Операция саккиз ҳафтагача давом этиши мумкин, дея қўшимча қилди Хегсет.

Тайёрлаган Дилшодбек Асқаров

#Эрон #Доналд Трамп

Эрон ядро дастури бўйича музокаралар расман тугамай туриб, 2026 йил 28 феврал куни АҚШ ва Исроил Эрон ҳудудига зарбалар бера бошлади. Президент Доналд Трамп ҳужумлардан мақсад Теҳрондаги режимни ағдариш эканини эълон қилди.