Reuters: Америка разведкаси Эронда режим қулаши аломатларини кўрмаяпти

Эрон раҳбариятининг позицияларида сезиларли ўзгаришлар йўқ, у яқин вақтлар ичида қулаш хавфи остида эмас. АҚШ разведкаси шундай хулосага келди, деб ёзади Reuters манбаларга таяниб.

Агентлик суҳбатдошларидан бирининг сўзларига кўра, «кўплаб» разведка ҳисоботларида Эрон режими «аҳоли устидан назоратни сақлаб қолмоқда» деган хулоса мавжуд.

Исроил расмийлари ҳам ёпиқ учрашувлар чоғида уруш Эронда ҳокимият алмашинувига олиб келишига ишонч йўқлигини тан олишган.

Reuters суҳбатдошларидан бири Эрондаги ҳокимиятни ағдариш учун қуруқлик орқали амалиёт ўтказилиши талаб этилишини айтган.

АҚШ ва Исроил 28 феврал куни Эрон бўйлаб зарбалар беришни бошлаганди. Бунга жавобан Теҳрон Исроилга ҳамда Вашингтоннинг Яқин Шарқдаги базаларига зарба беришга киришди. Исроилнинг 28 феврал кунги авиазарбалари оқибатида Эрон диний раҳнамоси Али Хоминаий ҳалок бўлган. Унинг ўрнига ўғли Мужтаба Хоминаий мамлакатнинг янги раҳбарига айланган.

The Wall Street Journal маълумотига кўра, АҚШ президенти Доналд Трамп ўз ёрдамчилари билан мулоқотда агар талаблар бўйича ён бермайдиган бўлса, Мужтаба Хоминаий ўлдирилишига қарши эмаслигини билдирган. Трампнинг ўзи Эрон «сўзсиз таслим бўлгач», мамлакатнинг янги раҳбарини тайинлашда иштирок этиши кераклигини айтган.