АҚШ Эрон нефт экспорти учун ҳал қилувчи аҳамиятга эга Харк оролига ҳужум қилди

АҚШ Марказий қўмондонлиги Эроннинг энг йирик нефт терминали жойлашган Харк оролида “Яқин Шарқ тарихидаги энг кучли бомбардимонлардан бири”ни амалга оширди ва “барча ҳарбий нишонларни тўлиқ йўқ қилди”. Бу ҳақда АҚШ президенти Доналд Трамп 14 март, шанбага ўтар кечаси Truth Social ижтимоий тармоғидаги саҳифасида маълум қилди.

Америка раҳбарининг сўзларига кўра, у “одоб-ахлоқ юзасидан” Эроннинг “дурдонаси”даги нефт инфратузилмасини йўқ қилишдан тийилган.

“Бироқ агар Эрон ёки бошқа кимдир Ҳўрмуз бўғози орқали кемаларнинг эркин ва хавфсиз ўтишига тўсқинлик қилувчи ҳар қандай ҳаракатни амалга оширса, мен бу қароримни дарҳол қайта кўриб чиқаман”, — деб ёзди Трамп.

АҚШ президенти яна шундай деди: “Эрон биз ҳужум қилишни истаган объектларни ҳимоя қилишга қодир эмас”.

“Эрон ҳеч қачон ядровий қуролга эга бўлмайди ва у Америка Қўшма Штатлари, Яқин Шарқ ёки, умуман олганда, бутун дунёга таҳдид сола олмайди!” — деб ёзди Трамп.

Узунлиги тахминан 8 км, кенглиги 4–5 км бўлган, Форс кўрфазида жойлашган кичик Харк ороли экспортга йўналтириладиган Эрон нефтининг 90 фоизини юклаб жўнатиш учун ҳал қилувчи аҳамиятга эга. Ҳар йили у ерда тахминан 950 миллион баррель нефт қайта ишланади. Орол аҳолиси тахминан 10 минг нафарни ташкил қилади.

Бундан олдин, март ойида Британиянинг The Telegraph газетаси Харкни эгаллаб олиш АҚШга Эрон раҳбариятини мамлакатнинг материк қисмига қўшин киритмасдан туриб назорат қилиш имконини беришини ёзган эди. Мақола муаллифи шунингдек Трампнинг 1988 йилда Британиянинг The Guardian газетасига берган интервюсига ҳам таянган. Унда бизнесмен президентликка сайланган тақдирда Эрон бўйича режалари ҳақидаги саволга жавобан, “Харк оролини култепага айлантирган бўлардим”, деган эди.

“Мен Эронга нисбатан қаттиққўл бўлардим. Улар бизни руҳий жиҳатдан эзмоқда, бизни бир тўда аҳмоқ қилиб кўрсатмоқда. Аскарларимиз ёки кемаларимизга қарши бирорта ўқ узилса, мен Харк оролини култепага айлантирган бўлардим. Мен у ерга бостириб кириб, уни эгаллаб олган бўлардим. Эрон ҳатто Ироқни ҳам енга олмаяпти, лекин шу билан бирга Америка Қўшма Штатларини оёқости қилмоқда. Дунё учун улар билан жанг қилиш фойдали бўларди”, — деган эди Трамп ўшанда.