Ҳиндистон компанияси Ўзбекистон қишлоқ ҳудудларини юқори тезликдаги интернет билан таъминлашда ҳамкорликни таклиф этди

Ўзбекистоннинг Ҳиндистондаги элчиси Сардор Рустамбоев “Tejas Networks” компанияси вице-президенти Ражниш Кҳуллар билан учрашди.

Ражниш Кҳуллар Ҳиндистондаги йирик лойиҳаларни амалга ошириш тажрибаси, жумладан, “BSNL” давлат оператори учун миллий 4G тармоғини ёйиш ва 250 мингдан ортиқ қишлоқ аҳоли пунктларини юқори тезликдаги интернетга улаш борасидаги маълумотлар билан ўртоқлашди.

Ҳамкорликнинг асосий йўналишлари сифатида “Tejas Networks” вице-президенти “Ўзбектелеком” АК билан 5G алоқа стандартларига ўтиш, симсиз инфратузилмани ривожлантириш ва Ўзбекистоннинг қишлоқ ҳудудларини юқори тезликдаги интернет билан таъминлаш жараёнида ўзаро ҳамкорлик қилишни таклиф этди.

Томонлар Ўзбекистон ҳудудида замонавий телекоммуникация ускуналарини ишлаб чиқаришни ташкил этиш имкониятларини муҳокама қилди. Бундан ташқари, илғор телекоммуникация технологиялари соҳасида малакали муҳандислар тайёрлаш мулоқотнинг муҳим масаласига айланди.

“Tejas Networks” телекоммуникация ускуналарини ишлаб чиқарувчи ва лойиҳаловчи етакчи компаниялардан бири бўлиб, алоқа операторлари, интернет-провайдерлар, мудофаа ва давлат секторлари учун юқори технологик маҳсулотлар етказиб беради.