АҚШ ва Эрон ўртасида эҳтимолий келишув муҳокама қилинмоқда

АҚШ ва Эрон бўлажак эҳтимолий келишувнинг тахминан 15 банди бўйича келишувга эришди. Бу ҳақда Оқ уй раҳбари Доналд Трамп Флоридада журналистлар билан мулоқот чоғида маълум қилди. Унинг сўзларини 23 март, душанба куни dpa агентлиги келтирган.

Трампнинг таъкидлашича, Теҳрон ҳеч қачон ядровий қуролга эга бўлмаслигига розилик билдирган. АҚШ президенти Ислом Республикаси вакиллари билан “жуда интенсив” музокаралар ҳақида яна гапирди, аммо Вашингтон айнан ким билан мулоқот қилаётганига ойдинлик киритмади. У фақатгина суҳбатдош мамлакатнинг янги олий раҳбари Мужтаба Хоминаий эмаслигини, балки Доналд Трамп Эрондаги энг ҳурматли шахс деб ҳисоблайдиган одам эканини қўшимча қилди.

Axios нашри исроиллик амалдорга таяниб ёзишича, гап Эрон парламенти спикери Муҳаммад Боқир Ғолибоф ҳақида кетмоқда. Шу манба журналистларга воситачи давлатлар унинг иштирокида Покистон пойтахти Исломободда учрашув тайёрланаётганини, у “ҳафта охирида бўлиши мумкин”лигини айтган. Американинг ушбу учрашувдаги вакиллари сифатида Стивен Уиткофф, Жаред Кушнер ва эҳтимол вице-президент Жей Ди Вэнс қатнашиши мумкин.

Axios’нинг яна бир манбаси эса Ғолибоф билан Трамп жамоаси ўртасида тўғридан тўғри музокаралар бўлмаганини, аммо улар Миср ва Туркия орқали хабар алмашганини айтган.

Оқ уй раҳбари Эронда юз бераётган воқеаларни “режим алмашуви” деб атади ва томонлар ўртасида телефон мулоқоти бўлишини маълум қилди. Унинг сўзларига кўра, “уларга (эронликларга) у ердан чиқиб кетиш жуда қийин бўлса керак”.

Ғолибофнинг ўзи эса X тармоғидаги саҳифасида АҚШ билан “ҳеч қандай музокаралар” бўлмаганини ёзди. Унинг таъкидлашича, “сохта хабарлар молиявий ва нефт бозорларини манипуляция қилиш, шунингдек, АҚШ ва Исроил ботиб қолган ботқоқдан чиқиб олиш учун қўлланмоқда”.

Эрон Ташқи ишлар вазирлиги матбуот котиби ҳам 28 февралдан сўнг АҚШ билан музокаралар ўтказилгани ҳақидаги хабарларни рад этди. Айнан шу санада АҚШ Исроил билан биргаликда Ислом Республикасига қарши ҳарбий кампания бошлагани айтилган.

Давлат ахборот агентлиги IRNA вазирлик вакилига таяниб хабар беришича, воситачи давлатлар Вашингтон урушни тўхтатиш бўйича музокараларга тайёр эканини кўрсатувчи хабарларни етказган, аммо Теҳрон уларга жавоб бермаган.

Шу куннинг ўзида Доналд Трамп АҚШ Эроннинг электр станциялари ва энергетика инфратузилмасига зарбаларни беш кунга кечиктиришини билдирган эди. Бу ҳақда у Truth Social ижтимоий тармоғида Пентагонга берилган тегишли топшириқ ҳақида ёзган.

Оқ уй раҳбари сўзларига кўра, бундай қарор АҚШ ва Эрон томонлари ўртасида Яқин Шарқдаги қарама-қаршиликни “тўлиқ ва якуний тарзда ҳал этиш”га доир икки кунлик “жуда муваффақиятли ва самарали музокаралар”дан кейин қабул қилинган.

“Ушбу чуқур, батафсил ва конструктив музокараларнинг руҳи ва оҳангидан келиб чиқиб, улар бутун ҳафта давомида давом этади, мен ҳарбий вазирликка Эроннинг электр станциялари ва энергетика инфратузилмасига қарши ҳар қандай ва барча ҳарбий зарбаларни, келгуси учрашувлар ва муҳокамалар муваффақиятли кечиши шарти билан, беш кунлик муддатга кечиктириш ҳақида кўрсатма бердим”, — деб ёзди АҚШ президенти.

Бу сўзлардан кейин нефт нархлари кескин тушиб кетди.