Пентагон Эронга «ҳал қилувчи зарбани» тайёрламоқда – ОАВ

Пентагон можарони ҳал қилиш бўйича дипломатик саъй-ҳаракатлар натижа бермаса ва айниқса, Ҳўрмуз бўғози блокдан чиқарилмаса, Эронга қарши операцияларда кенг кўламли эскалацияга тайёрланмоқда. Америкалик ҳарбий раҳбарлар Эронга «ҳал қилувчи зарба» вариантларини ишлаб чиқмоқда, уларнинг деярли барчаси қўшинларни киритиш, шунингдек, оммавий бомбардимонларни ўз ичига олади, деди Axios нашрига икки америкалик амалдор ва муҳокамалар жараёнидан хабардор бўлган яна икки манба.

Улар Доналд Трампга танлаш учун тақдим этиладиган «ҳал қилувчи зарбанинг» тўртта асосий вариантини тасвирлаб берди: Эрон нефть экспортининг асосий маркази бўлган Харқ оролига қўшин тушириш ёки уни қамал қилиш; Эронга Ҳўрмуз бўғози устидан назоратни сақлаб қолиш имконини берувчи Ларак оролига қўшин тушириш: у ерда кемаларни портлатиш ва миналаш учун мўлжалланган бункерлар, катерлар ва денгиз дронлари, шунингдек, бўғоздаги ҳаракатни кузатувчи радарлар жойлашган.

Бундан ташқари, стратегик Абу Мусо ороли ва бўғознинг ғарбий кириш қисмида жойлашган ва Эрон томонидан назорат қилинадиган иккита кичикроқ оролни қўлга киритиш; Эрон нефтини экспорт қилувчи кемаларни тўсиб қўйиш ёки қўлга олиш режалаштирилган.

АҚШ ҳарбийлари, шунингдек, Эрон ҳудудининг ичкарисида юқори бойитилган уранни қўлга киритиш учун қуруқликдаги операция режаларини тайёрлагани таъкидланмоқда. Унинг муқобили Эроннинг ушбу материаллардан маҳрум қилиш учун ядровий объектларга кенг кўламли ҳаво ҳужумларини амалга ошириш бўлиши мумкин.

Трамп Эрон ҳудудига қўшин киритиш ҳақида буйруқ беришга тайёр, бироқ бунга шошилмаяпти, чунки бу қисман унинг мақсадига эришишга - можаронинг тезроқ тугашига тўсқинлик қилиши мумкин, деди Оқ уйдаги мунозаралардан хабардор одамлар The Wall Street Journal нашрига. У ёрдамчиларига яқин ҳафталарда урушни тўхтатмоқчи эканини айтган. Расмийларга кўра, Трамп уруш давом этса, америкалик аскарлар орасида йўқотишлар кўпайишидан хавотирда.

Баъзи америкалик амалдорларнинг фикрича, ҳалокатли ҳарбий қудратни намойиш этиш эҳтимолий тинчлик музокараларида АҚШ позициясини кучайтиради ёки Трампга шунчаки уни АҚШ устунлиги сифатида кўрсатиш ва ғалаба қозонганини эълон қилиш имконини беради, деб ёзди Axios.

Нашр манбаларига кўра, Трамп ҳозирча сценарийлардан бирортасини танламаган, Оқ уй вакиллари эса қуруқликдаги ҳар қандай операцияларни «назарий» деб атамоқда.

Бундан ташқари, Эрон қўшинлари ҳам АҚШ томонидан эҳтимолий «ҳал қилувчи зарбани», жумладан, қуруқликдаги операцияни кутмоқда. Эрон АҚШ қўшинларининг Харққа бостириб киришига тайёргарлик кўрди, деб хабар берди CNN телеканалига АҚШ разведкаси маълумотлари билан таниш манбалар.

Оролда кўп босқичли мудофаа тизими қурилган, сўнгги ҳафталарда Теҳрон у ерга қўшимча қўшинлар, кўчма зенит-ракета мажмуалари, пиёдалар ва танкларга қарши миналар ташлаган. Улар қирғоқ бўйлаб ўрнатилиб, Америка десантининг тушишига тўсқинлик қилади.